Es Wiehnachtsfäscht, wie’s no nie eis geh hät!
I wish you a merry Christmas! Cliff und Hänger, die längste Geschichte, die die Logorö je erlebt hat, findet heute ihr Ende. Natürlich wie es sich gehört mit einem gewaltigen Fest! Weihnachtsschmuck an den Baum und hinein ins letzte Kapitel!
Previously on Cliff und Hänger:
Es isch gschafft! Eusi Helde händ d’Prinzässin vo Loretanie chöne befreie! Us wellne Gründe au immer, hät die nachher ihre Entfüehrer, dä Herzog vo Möhretal ghürate und es grosses Fäscht gfiiret. Dä Cliff hät vo ihre en Bluemestruus übercho und sich grad amene Dorn vo einere Blueme gstoche. Uf das abe isch ihm trümmlig worde.
Kapitel 24
Es Wiehnachtsfäscht,
wie’s no nie eis geh hät!
Völlig verwirrt isch dä Cliff wieder vor sinere Huustür gstande. Sin Duume hät blüetet, am Bode isch ä wunderschöni Rose gläge.
Kein Gumpi! Kein Herr Igel! Keis Königriich Loretanie! Au kein Herzog vo Möhretal!
Er isch zrugg i d’Stube gange, wo dä Hänger uf em Sofa gschlafe hät. Dä Fernseh isch gloffe.
Han ich das alles nume träumt, hät er sich gfröget. Das cha doch nöd si! Eso es spannends Abentüür han ich i mim ganze Läbe no nie erläbt! Und jetzt söll alles verbi si? Nur en Traum?
Truurig hät er sich näbed dä Hänger is Sofa gheie lah.
Da hät’s a dä Tür glüütet.
Völlig durenander vo allem hät sich dä Cliff nöd getraut, d’Tür uf’z’mache. Er isch eifach sitze blibe und es hät es zweits Mal glüütet.
„Wotsch nöd d’Tür ufmache?“ hät dä Hänger verschlafe näbed ihm gfröget.
Em Cliff isch en Stei vom Herz gfalle. „Du chasch immer no redä, Hänger?“
„Natürlich“, hät dä Hänger gseit. „Aber gah du jetzt ändlich go luege, wer bi eus lüütet!“
Dä Cliff isch zur Tür grännt und hät ä riesigi Überraschig erläbt.
Vor dä Tür sind sie alli gsi! Dä Herr Igel! Dä König Lolo! S’Prinzässli Lea, Arm in Arm mit em Herzog vo Möhretal! D’Giggeli-Zwerge! D’Muulwürf, wo als erschts grad gfröget händ, öb’s am Chrischtbaum Schläckstängel hebi! S’redendä Trampolin mit dä drü Känguruhs! D’Meerjungfrau, wo inere gfüllte Badwanne vo Hunderte vo Summervögel zoge worde isch! Und natürlich dä Gumpi, wo no immer es goldig glitzernds Horn uf dä Stirn treit hät.
Dä Cliff hät alli inebäte und sie händ es Wiehnachtsfäscht gfiiret, wie’s no nie eis geh hät!
Als erschts isch dä Papa Muulwurf natürlich – Päff! – in Chrischtbaum inegloffe und hät en umgrüehrt. D’Chrischtbaumchugle sind allne nume so um d’Ohre gfloge!
Sie händ alles wieder ufgstellt und d’Prinzässin Lea hät vo ihrere Hochziitsreis nach Stockholm verzellt. Es seg wunderschön gsi und dä Herzog vo Möhretal seg mittlerwiil würkli scho ganz en liebe worde.
Dä Herzog sälber hät i dä Stube vom Cliff es Glaschäfig entdeckt. Det ine sind ganz viel winzig chliini Häsli umeghüpft und dä Herzog hetti chöne schwöre, dass das sini ehemalige Häslipirate gsi sind. Aber so chlii?
D’Giggeli-Zwerge händ dä Fernseh igstellt und sich grad kaputt glacht über das, was sie det ine gseh händ. Sie händ immer wieder uf en andere Sender gwächslet, aber überall isch nur Blödsinn cho!
I eim Film isch ä Frau mit emene Gartezwerg i dä Wält umenander greist und hät Föteli vom Zwerg als Poschtcharte hei gschickt. D’Giggeli-Zwerge händ sich fascht nüm chöne erhole vor luuter Lache.
Dä Herr Igel hät dä Familie Muulwurf es Päckli gschänkt mit vier feine Schläckstängel drin und d’Meerjungfrau isch go dusche und vier Stund nüm unter dä Duschi füre cho.
Sie händ gschwätzt und glacht, bis es ganz spaht worde isch. Dänn isch em Cliff öppis in Sinn cho.
„Händ ihr eigentlich min schöne Stern uf em Baum obe scho gseh?“ hät er i d’Rundi gfröget.
„Nei“, händ die andere gseit. „Es hät nämlich au gar kein Stern uf em Baum, min Liebe.“
Dä Cliff hät dä Baum aglueget. Und würklich! Sin herrliche Stern isch weg gsi! A sinere Stell isch en chliine Brief gsi und dä hät dä Cliff jetzt allne vorgläse.
Dä Stern isch weg!
Hurra! Hurra!
Mir händ ä grossi
Freud da dra.
Wenn ihr wieder wänd
unter ihm singe,
müend ihr eus
1 Million Nüssli bringe!
Wer mir sind?
Mir wänd’s verrate!
Mir sind d’Bandi
vo dä Eichhörnlipirate!
Sapperlott! Gaht das scho wieder wiiter!
Aber um das kümmere ich mich s’nächscht Jahr, hät dä Cliff dänkt und dä Brief uf d’Siite gleit.
Und sie händ all zäme, au ohni Stern uf em Baum, die prächtigschte Wiehnachte gfiiret, wo mer sich nur cha vorstelle.
Mir wünsched allne ganz schöni Wiehnachte!
Jasmin und Staromat
Verantwortlich für d’Zeichnige
D’Jasmin isch 6i und gaht in zweite Chindsgi. Ihres Hobby wär Riite, wenn sie es Rössli hetti. Sie tuet gern baschtle, zeichne und ihrem Vater uf dä Nase ume tanze.
Verantwortlich für d’Buechstabe
Dä Staromat isch älter als 6i und gaht ines Büro go schaffe. Sis Hobby wär Gitarre spiele, wenn er Talent hetti. Er tuet gern schriebe, Vermicelles ässe und sini Chind verwöhne.
Cliff und Hänger – Die Logorö-Adventsgeschichte 2013
Bisher erschienen:
- 01. Es überraschends Gschänk
- 02. S’gheimnisvolle Figürli
- 03. Hallo, min Name isch Hänger
- 04. Dä Gumpi cha nüm gumpe
- 05. Vo dä Prinzässin Lea, em König Lolo und emene truurige Kerli
- 06. Jetzt chömed d’Hasepirate!
- 07. Ä Schlacht, wo eigentlich gar keini gsi isch
- 08. En Wald volle Dichte
- 09. Dä trotteligi Herr Igel
- 10. D’Giggeli-Zwerge vo dä Giggeli-Berge
- 11. Dä Schwätz-Schwabbel wird ustrickst
- 12. Jetzt gaht’s ufe und abe!
- 13. Unterwägs mit em Büüteltaxi
- 14. Dä schnäll wachsendi Mais
- 15. Es flüügends Häxehüüsli
- 16. Wärum Häxe nöd gern Spiegel händ
- 17. Dä Gumpi wird es Spielzügrössli
- 18. Es Meer wo cha rede?
- 19. S’unüberwindbare Meer wird unterwunde
- 20. En zauberhafte Bsuech bi dä Familie Muulwurf
- 21. Die verboteni Tür
- 22. D’Häslipirate werded überlischtet
- 23. Ä unerwarteti Wändi
