D’Häslipirate werded überlischtet
Jetzt geht’s zur Sache bei Cliff & Hänger! Die Hasenburg des üblen Herzogs von Möhretal ist erreicht und will gestürmt werden. Die Frage ist bloss: Wie? „Braveheart!!!“ und hinein ins Gemetzel oder doch mit Intelligenz und einem Plan? Kriegsbemalung aufs Gesicht und hinein in Kapitel 22!
Previously on Cliff und Hänger:
Nach enere lange Reis erreiched eusi Helde endlich Loretanie. Doch s’Riich vom Herzog vo Möhretal isch mit höche Muure versperrt. Hinter enerä verbotene Tür findet sie en gheime Gang, wo direkt zu dä Haseburg füehre söll.
Kapitel 22
D’Häslipirate werded überlischtet
Wie scho i dä Giggeli-Berge sind eusi Helde au jetzt wieder dur en dunkle Höhlegang gloffe. Glitzrigi Edelstei sind i dä Wänd ine gsteckt und händ es schwachs Liecht für eusi Wanderer abgäh.
Wo d’Höhli ä Kurve gmacht hät, sind sie plötzlich vomene Raschle verschreckt worde.
„Nöd scho wieder en Schwätz-Schwabbel!“ hät dä Cliff gruefe.
Vor ihne isch aber zum Glück keis vo denä Schlabber-Monschter gstande, sondern dä Oschterhas mit emene Chörbli voll Eier uf em Rugge.
„Tschuldigung, aber was bitte schön machsch du dänn i derä Gschicht?“ hät dä Cliff erstuunt gfröget. „Es isch Wiehnachte und nöd Oschtere!“
Dä Oschterhas hät verwirrt uf sini Uhr glueget und isch zämezuckt. „Jesses Gott, du häsch ja rächt!“ hät er gruefe und isch ganz nervös wieder us dä Gschicht use gumped.
Nach emene lange Marsch sind sie uf dä andere Siite vom Höhlegang acho. Au dä Usgang isch mit emene schwere Schloss versperrt gsi, doch au da hät em Cliff sin Schlüssel funktioniert.
Sie sind hinter emene Gschtrüpp usserhalb vo dä Burgmuure vom Herzog vo Möhretal usecho. D’Burg isch über und über vo Häslipirate bewacht worde. Überall hät mer Hasenohre use luege gseh und es hät nöd ei Möglichkeit geh, unbemerkt is Innere vo dä Burg z’cho.
„Ja und jetzt?“ hät dä Cliff gfröget. „Jetzt simmer bis da ane cho, händ s’Dichtewäldli und d’Giggeli-Berge hinter eus glah, en Schwätz-Schwabbel und ä Häx besiegt und es unüberwindbars Meer unterwunde. Und jetzt simmer da und händ kein Plan?“
„Doch“ hät dä Herr Igel gseit und uf em Hänger sin Sack mit dä Schrumpfrüebli zeiget.
„Spiesset die all uf mini Stachle druf. Uf jede Stachel eis Rüebli. Und dänn lueged mir zue!“
Meh hät dä Herr Igel nöd welle säge, will er sälber nöd sicher gsi isch, öb sin Plan au würklich funktioniert. Sie händ ihm also d’Schrumpfrüebli uf d’Stachle gsteckt und eso isch dä Herr Igel uf s’Igangstor vo dä Burg zuegwatschlet. D’Häslipirate händ all scho i dä Luft gschnupperet und dä feini Duft vo denä Rüebli i dä Nase gha.
Dä Herr Igel hät s’Tor erreicht, hät sich genau vore dra am Bode zämekrugelet und luut „Apéro!“ gruefe.
D’Häslipirate händ die wie uf Zahstocher ufgspiesste Rüebli gseh und sind all usegrännt. Jedes Häsli hät eis Rüebli packt und hät’s ratzfatz verputzt.
Da isch au em Hänger en Idee cho. Er hät sin andere Sack füre gnah, dä mit dä Schläckstängel dine, und hät en i höchem Boge näbed dä Herr Igel gschosse.
„Dessert!“ hät er dadäbi gruefe.
D’Häslipirate händ sich im Schlaraffeland gfühlt. Nach Rüebli no Schläckstängel! Heirassa! Und dänn au no so grossi! Die Schläckstängel sind all öppe drü Mal so gross gsi wie d’Häsli sälber! Yämmi!
„Du Kari“, hät ufs Mal eis Häsli zum andere gseit. „Wieso händ mir eigentlich all zäme i eim einzige Schläckstängelsack Platz?“
Jetzt händ sie gmerkt, dass sie gschrumpft worde sind, doch es isch scho z’spaht gsi. Dä Cliff isch zum Tor grännt, hät dä Sack mit allne Miniatür-Häsli drin packt und sofort guet zue gschnüert.
„Die bring ich i min Zoo!“ hät er sich gfreut. „Das sind jetzt aber würklich emal ächti Zwerghäsli!“
„Nume nöd z’schnäll!“ hät ä Stimm hässig usgruefe.
Dä Herzog vo Möhretal isch us dä Burg träte und uf eusi Fründe zue cho.
Dä letschti Kampf, er bahnt sich a
morn isch dä Herzog vo Möhretal dra!
Cliff und Hänger – Die Logorö-Adventsgeschichte 2013
Bisher erschienen:
- 01. Es überraschends Gschänk
- 02. S’gheimnisvolle Figürli
- 03. Hallo, min Name isch Hänger
- 04. Dä Gumpi cha nüm gumpe
- 05. Vo dä Prinzässin Lea, em König Lolo und emene truurige Kerli
- 06. Jetzt chömed d’Hasepirate!
- 07. Ä Schlacht, wo eigentlich gar keini gsi isch
- 08. En Wald volle Dichte
- 09. Dä trotteligi Herr Igel
- 10. D’Giggeli-Zwerge vo dä Giggeli-Berge
- 11. Dä Schwätz-Schwabbel wird ustrickst
- 12. Jetzt gaht’s ufe und abe!
- 13. Unterwägs mit em Büüteltaxi
- 14. Dä schnäll wachsendi Mais
- 15. Es flüügends Häxehüüsli
- 16. Wärum Häxe nöd gern Spiegel händ
- 17. Dä Gumpi wird es Spielzügrössli
- 18. Es Meer wo cha rede?
- 19. S’unüberwindbare Meer wird unterwunde
- 20. En zauberhafte Bsuech bi dä Familie Muulwurf
- 21. Die verboteni Tür
