Jetzt chömed d’Hasepirate!
Bei Cliff & Hänger kommen heute nicht der Samichlaus und der Schmutzli, sondern die Hasenpiraten! Und diese üblen Gesellen haben keine Nüsse und Mandarinen mit dabei! Sie sind bis an die Zähne bewaffnet mit Säbel und Pistolen! Ring frei für Cliff & Hänger Kapitel 6!
Previously on Cliff und Hänger:
Vo ihrem neue Fründ, em Rössli Gumpi, erfahred dä Cliff und dä Hänger vo dä schlimme Ereignis in Loretanie! Dä Herzog vo Möhretal hät um ä Audienz bim König Lolo bäte und das verheisst nüüt Guets!
Kapitel 6
Jetzt chömed d’Hasepirate!
Dä Gumpi hät verzellt und verzellt und dä Cliff und dä Hänger händ ihm beidi supergspannt zuegloset.
Dä Herzog vo Möhretal hät sich also überleit, dass es für ihn sehr agnehm wär, wenn d’Prinzässin Lea sini Frau würd werde. Dänn chönnt sie für sis Land singe und sis ganze Volk wär z’friede.
Viellicht chönnt er ihne dänn ja sogar die ganzi Ernti wegnäh? Sie wäred ja immer no glücklich, sobald d’Lea für sie singe würd.
So hät sich dä Herzog vo Möhretal also schön azoge – und schön heisst bi ihm, dass er en grässliche grüen-rot-violett gstreiflete Pulli azoge hät, däzue hellblaui Hose und es rots Chopftuech. Natürlich hät er sich au ä Maske übers Gsicht zoge.
Jetzt isch er mit sim beschte Ross is Königriich Loretanie gritte. Widerwillig hät ihm dä König Lolo ä Audienz gwährt. Schliesslich muess en König höchi Lüüt us andere Länder immer empfange, au wenn er das gar nöd wott.
Dä Herzog vo Möhretal isch zum König ane und hät ihm gseit, dass er d’Prinzässin Lea hürate werdi. Dä König und d’Prinzässin sind entsetzt gsi vo derä Vorstellig und händ beidi sofort Nei gseit.
Mit dem aber hät dä Herzog vo Möhretal grächnet gha und so hät er drü Mal luut pfiffe.
Uf das abe isch z’erscht mal nüt passiert und dä König Lolo hät sich scho gfröget, wärum dä Herzog so komisch umenander pfiife würdi, doch dänn hät mer plötzlich vo wiit ewäg es liesligs Trummle ghört.
Mit dä Ziit sind die Trummel-Grüsch lüüter und lüüter worde und uf’s mal isch am Horizont es grosses Schiff uftaucht!
Wie isch das nur möglich, hät sich dä König Lolo gfröget. Es Schiff brucht doch Wasser! Aber das Schiff, wo immer nöcher und nöcher cho isch, isch eifach so übers Land gfahre.
Es hät grossi Räder une am Rumpf gha und uf denä isch es fürschi grollt. Es grosses orangs Sägel hät’s voratriebe und z’oberscht obe hät mer ä Totechopf-Flagge chöne erchänne. Statt Chnöche sind aber zwei Rüebli g’chrützt unter em Schädel abbildet gsi…
„D’Hasepirate!“ händ all Bewohner vo Loretanie ufgschroue. „Mir sind verlore!“
Vo dä Hasepirate hät mer in Loretanie scho viel ghört. Und no nie guets!
Sie würded räubere und plündere und vor nüüt Halt mache! Wenn d’Chind in Loretanie en Blödsinn gmacht händ, so händ ihri Eltere amigs gseit: „Wart nume! Wenn du so wiiter machsch, dänn holed dich eines Tages d’Hasepirate!“
Niemmert hät aber die Hasepirate würklich scho mal gseh oder erläbt. Drum hät niemmert gwüsst, öb’s die Pirate au würklich geh würdi oder nöd.
Bis ebe zu dem Tag, wo sie sich mit ihrem Schiff i höchem Tempo em Königsschloss gnöcheret händ.
Jetzt hät mer scho en mürrische alte Has chönne erchänne, wo hine uf em Schiff rhythmisch uf ä Trummle gschlage hät.
Dä Herzog vo Möhretal hät superfiis glachet und dä König Lolo no es letschts Mal gfröget, öb er jetzt sini Tochter dörfi hürate oder nöd.
„Nie im Läbe!“ hät dä Lolo gruefe. „Da muess scho meh cho als es Schiff volle Zwerghäsli, dämit ich dir mini Tochter zur Frau gibe!“
Dänn hät s’Pirateschiff s’Schloss erreicht und mit luutem Gschrei sind Hunderti, ja viellicht sogar Tuusigi vo Hase mit Säbel und Pischtole bewaffnet usegumpet.
So spannend’s jetzt au mag si
morn gaht’s wiiter, das isch scho gli.
Cliff und Hänger – Die Logorö-Adventsgeschichte 2013
Bisher erschienen:
