Vo dä Prinzässin Lea, em König Lolo und emene truurige Kerli
Es ist soweit! Die Geschichte in der Geschichte geht heute los. Und dies mit scharf und allem! Singende Prinzessinnen, sich sorgende Väter und ein Tyrann vom Feinsten! Cliff & Hänger Kapitel 5 hat es in sich!
Previously on Cliff und Hänger:
Uf dä Reis nach Loretanie, wo dä Cliff und dä Hänger d’Prinzässin Lea wänd go rette, lerned die beide s’Rössli Gumpi känne. Und das Rössli weiss GANZ viel z’verzelle!
Kapitel 5
Vo dä Prinzässin Lea, em König Lolo
und emene truurige Kerli
Dä Gumpi isch en Volltreffer gsi für dä Cliff und dä Hänger. Das herzige Ross hät ihne verzellt, dass es eigentlich us em Stall vo dä Prinzässin Lea stammi und dass es grosses Unglück über ihres Königriich Loretanie cho seg.
Gspannt und muggsmüslistill händ dä Cliff und dä Hänger em Gumpi zuegloset.
D’Lea isch die schönschti Prinzässin gsi, wo je im Königriich Loretanie gläbt hät. Jede Morge, grad nach em Ufstah, isch sie uf dä gröschti Balkon vom Schloss gstande und hät gsunge.
Ihri Stimm isch wie es Wunder gsi. Im ganze Land hät mer sie ghört und überall händ d’Bäum agfange i dä schönschte Farbe z’blüehe, Summervögel sind über d’Fälder gfloge, ja sälbscht die chlinschti Wulchene händ sich verzoge und all Lüüt sind jede Morge glücklich und zfriede ufgwachet. Egal, was für Sorge oder Nöt sie gha händ, chum hät d’Prinzässin Lea für sie gsunge, isch es allne eifach nume no guet gange.
Ihre Vater, dä König Lolo, isch mächtig stolz uf sis Töchterli gsi. Er hät sie über alles gliebt und hät ihre jede Wunsch erfüllt, egal wie gross er au gsi isch.
Eines Tages hät d’Prinzässin Lea welle hürate.
A dem Tag isch es em König Lolo nüm so guet gange.
Sis Töchterli! Hürate! Gar am End no en Prinz us emene wiit entfernte Land!
Dänn würd er sini Lea ja gar nüme viel gseh und au mit ihrem Singe für sis Volk wärs viellicht für immer us und verbi!
Dä König Lolo hät studiert und überleit. Er hät sini gschiedschte Berater um Hilf bäte, doch niemmert hät ä Lösig gha.
Eine hät sogar gmeint, er, dä König, müessi d’Lea halt gah lah, so gern er sie au hebi, aber dä einzig, wo dä König drufabe gah lah hät, isch dä Berater mit derä blöde Idee gsi.
Und währenddem dä König Lolo und sini Berater so hi und her überleit händ, hät plötzlich dä Herzog vo Möhretal um ä Audienz bim König bäte.
Dä Herzog vo Möhretal isch en komische Herrscher us emene entfernte Tal gsi, em Möhretal. Er isch immer fürchterlich azoge gsi und niemmert hät ihn möge.
Dä Lüüt im Möhretal isch es gar nöd guet gange. Sie händ fascht alles vo ihrere Ernti müesse em Herzog abgäh. So guet wie nüt händ sie dörfe für sich bhalte.
S’ganze Land isch grau und chalt gsi und niemmert hät gern detä gläbt.
Em Herzog vo Möhretal isch das schnurzpiepenegal gsi. Dank dem sis dumme Volk ihm immer fascht die ganz Ernti abgeh hät, hät er sälber immer gnueg z’ässe gha und was sini Untertane gmuulet händ, das hät ihn nicht die Bohne interessiert.
Trotzdem wär’s ebe scho no agnehm gsi und au echli eifacher, wenn er d’Mensche i sim Land hetti chöne usbüüte und die dadäbi sogar no glücklich und zfriede gsi wäred.
Und wo er vo dä Prinzässin Lea erfahre hät, vo ihrem Gsangszauber und vo dä Sorge vom König Lolo, da hät er en furchtbare Plan gfasst!
Was füehrt dä Herzog ächt im Schild?
Morn setzt dä Gumpi eu is Bild.
Cliff und Hänger – Die Logorö-Adventsgeschichte 2013
Bisher erschienen:
