S’gheimnisvolle Figürli
Heute geht die diesjährige Logorö-Adventsgeschichte so richtig los! Glitzer-Steine kommen und verschwinden wieder. Eine geheimnisvolle Figur singt ein rätselhaftes Lied. Was da wohl dahinter steckt? Na ganz einfach: Kapitel 2 von Cliff und Hänger!
Previously on Cliff und Hänger:
Dä Cliff, en miserable Zoowärter, und sin Hund Hänger werded überrascht vonere alte Truhe, wo eifach so vor ihrere Wohnigstür staht.
Kapitel 2
S’gheimnisvolle Figürli
Dä Cliff hät die schweri Truhe ufgmacht und isch grad bländet gsi!
Sie isch bis obenufe gfüllt gsi mit prächtige, farbige Stei, wo glizzeret und gfunklet händ. Ä so öppis schöns hät dä Cliff i sim ganze Läbe no nie gseh!
Vorsichtig hät dä Cliff sini Händ i d’Stei inäghebet und hät drin umegrüehrt. Die zauberhafte Stei sind gegenenander gstosse und händ agfange klimpere. Mit jedere Bewegig vom Cliff isch das Klimpere lüüter worde und wieder lisliger, wenn er d’Händ nüme bewegt hät. Dä Cliff hät sich nöd möge erinnere, dass er je zuvor scho mal äso es schöns Grüsch ghört hät!
Plötzlich isch er mit einere Hand uf öppis Härts gstosse.
Langsam und vorsichtig hät dä Cliff sini Entdeckig us dä viele Stei zoge. Es isch es chliises Porzellan-Figürli gsi wo ufemene blaue Sockel gstande isch. Das Figürli hät usgseh wie ä wunderschöni Prinzässin.
Dä Cliff hät die prächtigi Figur lang und genau aglueget und i dä Händ umetrüllet. Da hät er une am Sockel es chliises Rädli entdeckt. Mit dem hät mer d’Figur chöne ufzieh.
Dä Cliff hät a dem Rädli trüllt, bis es nüme wiiter gange isch. Dänn hät er’s losglah.
Ä gheimnisvolli Melodie isch us em Sockel cho und s’Figürli hät es Lied däzue agstimmt. Dä Cliff hät d’Wörter z’erscht überhaupt nöd verstande. Es hät so tönt, wie wenn’s en Gsang inerä andere Sprach gis wär. Doch d’Melodie hät ihn wie verzauberet und plötzlich hät dä Cliff dä Text verstande:
Prinzässin Lea seit mer mir
Voller Verzwiiflig rüef ich dir
Ich bi gfange und cha nöd hei
Bitte, Retter, lass mich nöd ällei
Bisch du chräftig und au muetig
isch din Duume bald scho bluetig
Tue nöd zögere, glaub a dich
Schnäll, min Retter, befreie mich
Doch ällei dörfsch nöd los gah
Muesch unbedingt än Hälfer ha
Meh chan ich dir jetzt nüm vorsinge
Dä Schlüssel wird dich zu mir bringe
Dänn isch alles still worde. Dä Cliff hät d’Figur nomal welle ufzieh, doch s’Rädli unterem Sockel isch verschwunde gsi.
Was hät s’Figürli ihm grad vorgsunge? Ä gfangeni Prinzässin? Und er als Retter? Er? Dä schlächtischti Zoowärter vo dä ganze Welt!
Chräftig und muetig? Und en Hälfer müesst er au no ha? Grad er, wo doch immer so ällei isch.
„Wer chönnti dänn au min Hälfer si?“ hät er luut vor sich hi gfröget.
Dä Hänger näbed ihm hät luut afange belle.
Ja guet, en Hälfer hetti er scho mit siim liebe Hund, aber trotzdem: Wie um alles i dä Welt söll dänn er ä Prinzässin chönne rette? Und wo isch die Prinzässin überhaupt gfange?
Erscht jetzt isch em Cliff ufgfalle, dass alli Stei i dä Truhe plötzlich verschwunde gsi sind.
Verwunderet hät er i Truhe ine glueget. Die isch jetzt komplett leer gsi, nur une im Egge hät’s es chliises Schlüsselloch gha.
Dä Schlüssel wird dich zu mir bringe
Ja super, hät dä Cliff dänkt, aber wie bitte schön söll ich dä richtig Schlüssel für das Schloss finde?
Ufgregt isch dä Hänger um dä Cliff umegschwänzlet und hät mit sinere Schnauze immer wieder d’Hand vom Cliff agstubst. Oder besser gseit, dä Zoo-Schlüsselbund, wo sin Meischter immer däbi gha hät.
„Eine vo denä Schlüssel?“ hät dä Cliff sin Hund gfröget, wie wenn ihm dä en Antwort chönnti geh. „Meinsch würklich? Aber die Schlüssel sind doch für dä Zoo.“
Nützts nüt, schadts nüt, hät er dänkt und hät ein Zooschlüssel nach em andere is Schlüsselloch ine ghebt.
Natürlich sind alli nöd gange.
Ussert dä letscht!
Won er mit dem s’Schlüsselloch nume scho berüehrt hät, isch dä Schlüssel wie vo sälber ine gange und dä Cliff hät en voller Spannig umedrüllt…
Was passiert nach em Schlüsseldrülle?
Morn werdet ihr das scho enthülle.
Cliff und Hänger – Die Logorö-Adventsgeschichte 2013
Bisher erschienen:
