Dä Gumpi cha nüm gumpe
Heute erhalten Cliff und Hänger den ersten Gefährten auf ihrer Reise nach Mordor – äh – Loretanien. Doch Achtung! Ein übler Zeitgenosse schiesst auf alles, was er nicht sieht! Jetzt heisst’s in Deckung gehen und hinein ins Kapitel 4 von Cliff & Hänger!
Previously on Cliff und Hänger:
Dä Cliff und sin Hund Hänger werdet dur en Dornestich in ä Welt katapultiert, wo sie mitenander redä chönd. Sie wänd d’Prinzässin Lea vo Loretanie rette, doch z’erscht wieheret emal öppis us em Wald use.
Kapitel 4
Dä Gumpi cha nüm gumpe
Voller Ufregig sind dä Cliff und dä Hänger in Wald ine gsprunge. S’jaulende Wiehere isch ganz i ihrere Nöchi gsi. Und will dä Hänger ä supergueti Nase gha hät, händ sie scho bald dä Verursacher vo dem Jammere entdeckt.
Es herzigs, bruuns Rössli mit schwarze Pünkt uf em Fell und enere blonde Mähne isch zmitzt ufere Waldliechtig am Bode gläge. Es hät a eim Fuess blüetet und hät immer wieder vergäblich versuecht ufzstah.
Ui nei, hät dä Cliff dänkt, was isch dänn au da passiert?
„Dä dummi, doofi Jäger!“ hät s’Rössli usgruefe!
Offebar hät dä Cliff i dem Land nöd nume d’Sprach vom Hänger verstande, sondern vo allne Tier.
„Das isch sone blindi Nuss! Verwächslet dä mich doch glatt mit emene Reh! Und schüsst uf mich! Also, ich mein natürlich nöd, dass es besser wär, wenn er würd uf es Reh statt uf mich schüsse, aber trotzdem…“
Als Zoowärter hät sich dä Cliff mit verletzte Tier uskännt. Er hät sich vorsichtig em Rössli gnöcheret, hät sich und dä Hänger vorgstellt (öppis won er im Zoo doch eher weniger gmacht hät) und hät d’Verletzig aglueget. Es isch nume en Streifschuss gsi. Mit Blätter und dä richtige Chrüütli, hät dä Cliff gwüsst, chunnt das bald wieder guet.
S’Rössli hät Gumpi gheisse und hät ihne verzellt, dass es mit dem blöde Jäger eifach immer schlimmer worde isch i letschter Ziit. Er hebi ä Brülle mit Gläser so dick wie Fläscheböde und trotzdem, oder grad drum, schüssi er uf alles, wo sich bewegt. Und mit dem nöd gnueg!
I dä Nächt schlafi er amigs uf em Bänkli vor sim Hüttli und schnarchli so luut, dass dä halbi Wald nüme chönn schlafe. Wobi s’Schnarchle natürlich scho ein Vorteil hebi. I derä Ziit, wo dä Jäger schlafi, schüssi er wenigschtens uf niemert.
Dä Cliff hät dä Gumpi verarztet, so guet er das ohni siini Zoo-Erschti-Hilf-Box hät chönne und hät ä bäumigi Idee gha.
I dä nächschte Nacht sind sie z’dritte zum Jägerhüttli gschliche und händ gwartet, bis dä Jäger tüüf gschlafe hät.
Läck Bobby, hät dä gschnarchlet! Es isch würklich grauehaft gsi. Es hät tönt, wie wenn öpper alli Bäum vom Wald würdi mit enere Motorsagi abhaue.
Dänn hät sich dä Cliff em Jäger sini Brülle gschnappet und hät beidi Gläser mit emene Stift ganz schwarz agmalet. Nachher hät er d’Brülle, wo jetzt usgseh hät, wie ä superdunkli Sunnebrülle, wieder vorsichtig em schnarchlende Jäger azoge.
Sin Plan hät funktioniert.
Wo dä Jäger am nächste Morge ufgwachet isch, hät er sini Brülle agleit und umeglueget.
Will no immer alles schwarz und dunkel für ihn gsi isch, hät er gmeint es segi no Nacht, isch wieder anegläge und hät scho sehr bald wieder luut und fescht wiiter gschnarchlet.
I sim ganze reschtliche Läbe hät dä Jäger nöd ein einzige Schuss meh uf die arme Tierli abgfüret, will er nume no gschlafe hät.
Einzig sis furchtbare Schnarchle, mit dem händ d’Tier vom Wald jetzt halt au am Tag müesse läbe.
Wo dä Gumpi hät welle vom Cliff und em Hänger wüsse, was sie eigentlich i dem Wald mache würded, isch dene beide d’Prinzässin Lea wieder in Sinn cho.
I dä ganze Ufregig händ sie total vergässe, dass sie ja eigentlich en Uftrag gha händ.
Dä Gumpi isch ganz still worde, wo er dä Name vo dä Prinzässin ghört hät.
Er hät mehrmals um sich ume glueget und hät dänn eusne beide Helde lieslig öppis zuegflüschteret.
Was dä Gumpi ächt z’verzelle weiss?
Ich säge eu, die Spur isch heiss!
Cliff und Hänger – Die Logorö-Adventsgeschichte 2013
Bisher erschienen:
