Dä trotteligi Herr Igel
Nach der üblen Attacke der Dichten-Tannen von gestern, droht bereits das frühe Ende der Geschichte! Doch wie immer, wenn man kein Fünkchen Hoffnung mehr hegt, naht von irgendwo her ein Retter. In der Not gibt man sich selbstverständlich auch mit einem etwas trotteligen zufrieden…
Previously on Cliff und Hänger:
Uf ihrere Reis nach Loretanie grated dä Cliff, dä Hänger und dä Gumpi anen Wald volle Dichte – Bäum, wo mer nur in Reimform dörf antworte! Dä Cliff meischteret all Tanne souverän, bis uf die letschti! Detä macht er en Fehler und löst dadämit en gwaltige Sturm us.
Kapitel 9
Dä trotteligi Herr Igel
Es isch en unglaubliche Tannezapfe-Räge gsi, wo uf eusi Fründe abegheit isch. Hunderti, nei, Tuusigi, ja, Millione vo Tannezäpfe händ dä Cliff, dä Hänger und dä Gumpi so richtig unter sich begrabe. Es hät nume so prasslet und tätscht und klöpft vo all denä Zäpfe, wo no meh uf dä ganzi Huufe abegheit sind.
Nach emene Wiili isch es dänn still worde.
Weder dä Cliff, no dä Hänger oder dä Gumpi händ sich no chöne bewege. Sie sind gfange gsi unter emene riesige Berg vo Tannezäpfe. Es isch wortwörtlich zapfeduschter gsi. Keine vo ihne hät meh öppis chöne gseh.
„Hilfe! Hilfe!“ hät dä Hänger gruefe. Aber wer hett ihne dänn scho chöne hälfe i dem tüüfe Wald ine. Da isch doch sicher niemmert unterwägs gsi, oder?
Wiit ewäg händ sie liesligi Schritt ghört.
Es sind immer öppe drü bis vier Schritt gsi, dänn isch es Poltere cho, gfolgt vomene luute „Aua!“ und dänn wieder neui Schritt.
Sofort händ all drü zäme nach Hilf gruefe und würkli! D’Schritt sind grad bi ihne zue verstummt und öpper hät agfange, Tannezäpfe uf d’Siite z’ruume.
Nach emene Wiili händ sie ihre Retter chöne erblicke. Es isch en alte Igel gsi, wo em Cliff, em Hänger und em Gumpi us dä Tannezäpfe ghulfe hät.
„Ich bin dä Herr Igel“ hät er sich vorgschtellt. „Was mached dänn ihr da unter dem Zapfeberg?“
Nachdem dä Cliff alles verzellt hät und em Herr Igel gseit hät, dass sie wänd go d’Prinzässin Lea rette, isch das stachlige Tier sofort Füür und Flamme gsi.
„Ou ja! Da mach ich mit! Ich hilf eu! Los gaht’s!“ Volle Tatedrang hät dä Herr Igel es paar Schritt gmacht und isch – Päff! – uf emene Tannezapfe usgrutscht und ufs Füdli gheit. „Aua!“
Die andere händ ihm welle ufhälfe, doch dä Herr Igel hät nume abgwunke. „Keis Problem. Das passiert mir ununterbroche. Ich ha mich scho lang dra gwöhnt.“
Er isch ufgstande, hät es paar Tannezäpfe vo sine Stachle abgschüttlet und isch Bumm! über dä nächschti Tannezapfe inegheit.
Dä Cliff, dä Hänger und au dä Gumpi händ all grad gliichziitig s’Gliiche dänkt.
Wie söll eus au dä trotteligi Herr Igel chönne hälfe?
Wo sie aber wiiter händ welle, händ sie gmerkt, dass sie total d’Orientierig verlore händ. Alli Dichtene vo vorher sind weg gsi und eusi Fründe händ nüme gwüsst, vo woher sie cho sind und i welli Richtig sie eigentlich händ wiiter welle.
„Ihr wänd nach Loretanie?“ hät dä Herr Igel gseit. „Ich zeig eu gern, wo’s dure gaht.“
Er hät ihne es Zeiche gmacht, dass sie ihm sölled nahlaufe und isch schnuerstracks – Boing! – in nächschte Baum ine gloffe. Uf das abe hät sich dä Herr Igel churz d’Nase griebe und gseit: „Chömed er äntli?“
Mit emene Chopfschüttle sind eusi Fründe em trottelige Herr Igel nagloffe. Und würklich! Nach öppe 12 Über-Wurzle-Stolpere, 24 I-Bäum-ine-Laufe und 18 Chopf-a-Äscht-Aschlah sind sie scho usem Wald usecho.
„Gsehnd er?“ hät dä Herr Igel stolz gmeint und hät sich – Bumm! – s’Chnü amene Felse agschlage.
Vor ihne isch jetzt nämli alles total felsig gsi. Sie sind am Fuess vo dä Giggeli-Berge gstande.
Doch die Giggeli-Berge händ’s in sich gha. Scho nach wenige Meter, wo sie no ohni Problem händ chöne wiiter laufe, isch d’Felswand vor ihne fadegrad und supersteil duruf gange.
„Da chömed mir ja niemals ue!“ hät dä Cliff gjammeret und au die drü andere händ nume truurig d’Chöpf gschüttlet und a die chalti Felswand aneglueget.
Da händ sie ufs Mal hinter sich öppis raschle ghört!
Wie chömed sie ächt dä Berg duruf?
Morn gaht’s wiiter mit neuem Schnuf.
Cliff und Hänger – Die Logorö-Adventsgeschichte 2013
Bisher erschienen:
