Ä Schlacht, wo eigentlich gar keini gsi isch
Heute wird’s blutig bei Cliff & Hänger! Der Tag des grossen Gefechts von Loretanien wird in die Geschichtsbücher eingehen. Handelt es sich doch dabei um die einzige Schlacht, in der rein gar niemand geschlachtet wird! Helm auf und hinein in Kapitel 7!
Previously on Cliff und Hänger:
Dä Cliff und dä Hänger retted s’Rössli Gumpi und erfahred vo ihm, was sich in Loretanie abgspielt hät. Dä Herzog vo Möhretal isch mit sine Hasepirate bim Schloss vom König Lolo uftaucht und plant, d’Prinzässin Lea z’entfüehre!
Kapitel 7
Ä Schlacht, wo eigentlich gar keini gsi isch
Dä Tag vo dä grosse Schlacht isch als eine vo dä truurigschte Tage i d’Gschicht vom Königriich Loretanie igange.
Es hät nämlich gar nöd würklich ä Schlacht stattgfunde.
S’Königriich Loretanie isch es friedlichs Land gsi und so öppis ähnlichs wie Soldate oder usbildeti Kämpfer hät’s in Loretanie nöd gäh. Ein einzige Polizischt hät für dä König Lolo gschaffet, aber wo dä das Schiff volle Häslipirate gseh hät – alli bis uf d’Zäh bewaffnet – hät er öppis gmurmlet vo wäge, er müessi dringend öppis us em Archiv go hole und isch im nächschtbeschte Chäller verschwunde.
So isch es natürlich es Liechts gsi für dä Herzog vo Möhretal und sini Häslipirate, dä König Lolo uf sim Thron z’fessle, vo wo us er hät müesse mitaluege, wie d’Pirate sini Tochter, d’Prinzässin Lea, gfange gnah händ und uf ihres Schiff bracht händ.
Dä Herzog vo Möhretal hät sich vor em gfesslete König verbüget und isch au zum Schiff gange.
Churz bevor dä Herzog is Schiff igschtige isch, hät er sich nomal zum König umkehrt und luut gruefe:
„Danke für dis Töchterli, Lolo! Will ich en gnädige Herrscher bin, will ich nöd so si und mache dir es Agebot. Wenn du mir 1 Million Rüebli gisch, chunnsch du dis Prinzässli Lea wieder zrugg über.“
Und mit emene fürchterliche Glächter isch dä Herzog mit sine Häslipirate uf em Schiff dävo zoge.
Er hät d’Lea uf sini Burg bracht und ihre befohle, für ihn und sis Volk z’singe. Will sich d’Prinzässin aber standhaft gweigeret hät, hät er sie churzerhand im höchschte Turm vo sinere Burg igsperrt und gseit, dass sie erscht wieder use dörfi, wenn ihri Stimm s’Möhretal ändlich würdi verzaubere.
Zur Bewachig vo dä Prinzässin hät dä Herzog vo Möhretal d’Hälfti vo dä Häslipirate vom Schiff abzoge und im und um dä Turm ume verteilt.
In Loretanie isch dä König Lolo usser sich gsi vor Truur und Wuet! Er hät usgruefe und gjammeret, aber es hät alles nüt gnützt. Sis Töchterli isch weg gsi.
En chliine, alte Ma isch vor ihn anegstande und vor luuter Ufregig hät dä König Lolo nöd emal gmerkt, dass es sich um sin staatliche Schatzmeischter ghandlet hät.
„Nünädachtzg“ hät dä alti Ma lislig flüschteret.
„Was nünädachtzg?“ hät dä König gruefe. Er isch immer no ganz durenand und hässig gsi.
„Nünädachtzg Rüebli, Herr König. Mir händ sofort zählt, wie viel Rüebli mir im ganze Königriich chönd uftriebe und sind uf nünädachtzg cho. Und mit minere ganze Erfahrig als Schatzmeischter muen ich ihne leider mit-teile, dass nünädachtzg Rüebli düütlich weniger sind als die verlangte 1 Million Rüebli.“
Dä König hät nüme wiiter gwüsst. Sis Töchterli isch weg gsi und in ganz Loretanie hät mer vo dem Tag a niemmert meh fröhlich uf dä Strasse atroffe. Jedä Morge händ d’Lüüt ihri Feischter ufgmacht und ghofft, ändlich wieder die zauberhafti Stimm vo dä Lea singe z’ghöre, aber jede Morge händ sie ihri Feischter truurig wieder müesse zuemache.
Wo dä Gumpi das alles verzellt hät, isch ihm es Tränli über d’Bagge gloffe. Er hät’s immer nonig chöne glaube, dass das alles würklich so passiert isch.
I sinere Verzwiiflig hät dä König all Rösser vom Hof losgschickt, sie sölled i alli Richtige usriite und überall nach Hilf sueche. Und so isch au dä Gumpi unterwägs gsi, wo er im Wald vom Jäger agschosse worde isch. Und dänn zum Glück dä Cliff und dä Hänger atroffe hät.
„Und jetzt?“ hät dä Hänger gfröget.
„Jetzt gömmer natürlich go d’Prinzässin befreie!“ hät dä Cliff gseit und dä Gumpi hät grad en Gump gmacht vor Freud.
Wie schaffed’s eusi Helde bloss?
Morn gaht die Gschicht so richtig los!
Cliff und Hänger – Die Logorö-Adventsgeschichte 2013
Bisher erschienen:
