Dä Gumpi wird es Spielzügrössli
Heute wird gehext bei Cliff und Hänger! Jedoch nicht von der Hexe Lamontanara, weil die steht bloss noch wie ein Stein in der Gegend rum, sondern von unseren Titelhelden höchstpersönlich. Na, wenn das mal bloss gut geht!
Previously on Cliff und Hänger:
Bevor eusi Fründe d’Häx Lamontanara händ chöne überwältige, hät sie dä arm Gumpi versteineret! Jetzt holed dä Cliff und dä Hänger alles Mögliche us em Häxechäller ufe und wänd mit dem Züüg ihres Rössli wieder lebendig mache.
Kapitel 17
Dä Gumpi wird es Spielzügrössli
„Was bringed ihr da dänn alles für Sache ufe?“ hät dä Herr Igel welle wüsse, wo dä Cliff und dä Hänger us em Loch im Bode wieder ufecho sind.
Sie händ Dutzendi Vase und Ampore ufe gschleickt und händ sie näbed em Gumpi uf dä Bode gstellt.
„Jetzt heisst’s usprobiere!“ hät dä Cliff gmeint und s’erschte Zaubertrank-Gfäss ufgmacht. Es dünns Räuchli isch grad us dä Fläsche use cho. Läck Bobby, hät das gstunke!
Er hät es paar Tröpfli vo dem Zaubertrank uf en Löffel tah, isch zum versteinerete Gumpi gange und hät ihm dä Löffel is Muul ine ghebet.
Z’erscht isch nüt passiert und dä Cliff hät scho es anders Mitteli welle go hole, wo dä Gumpi plötzlich ganz komischi Grüsch vo sich geh hät.
Sini Huut us Stei isch weggsplitteret und dä Gumpi isch wieder fascht wie vorher gsi.
Aber ebe nur fascht.
Sis Fell isch jetzt grüen gsi.
„Danke fürs Entsteinere, mini Fründe“, hät er gmeint. „Aber holed bitte dä nächscht Zaubertrank. Ich bin doch kein Frosch!“
Jetzt hät dä Hänger es Mitteli usgsuecht. Au er hät em Gumpi es paar Tröpfe dävo geh und sofort isch sis grüene Fell wieder wunderschön bruun worde.
Dä Gumpi hät sich gfreut und hät sich welle bim Hänger bedanke, doch sini Stimm isch jetzt so tüüf gsi, dass mer en fascht nüme verstande hät.
„Heieiei!“ hät er tüüf brummlet. „So cha das aber au nöd bliebe! Ich bin doch nöd dä Samichlaus!“
Dä Cliff hät welle es anders Mitteli usprobiere, aber er isch vom Herr Igel unterbroche worde.
„Probier emal eis vo denä Rüebli da“ hät er vorgschlage und hät en schwere Sack volle Rüebli vor dä Gumpi uf dä Bode gstellt. „Die han ich im Chäller une gfunde. Nützts nüt, so häsch wenigschtens wieder emal öppis gässe.“
Dä Gumpi hät sich eis vo denä Rüebli gschnappet und häts rübisstübis abegschluckt.
„Mmmm, fein!“ hät er wieder mit enere ganz normale Stimm gseit.
Sie händ ihn no es Wiili lang genaustens untersuecht. Dä Gumpi hät wieder bis ufs letschte Detail genau so usgseh wie vor em Häxeagriff und eusi Fründe händ ufgjublet.
„Dä Gumpi isch wieder normal! Dä Gumpi isch wieder normal!“ händ sie gsunge und sich all umarmt.
„Säg emal“, hät dä Cliff dä Gumpi gfröget. „Han ich dich scho immer chöne umarme, ohni dass du dich bucke muesch?“
Jetzt händ’s doch nomal genauer ane glueget.
Dä Gumpi, wo vorher dütlich grösser gsi isch als dä Cliff, hät ihm jetzt genau gradus i d’Auge chöne luege.
„Ou nei!“ hät dä Herr Igel gruefe, woner dä Sack mit dä Rüebli nomal aglueget hät. „Die blöde Rüebli sind ja sogar agschriebe!“
Schrumpfrüebli
isch i dicke, grosse Buechstabe uf em Sack gstande.
Dä Gumpi isch chliiner und chliiner worde. Er isch gschrumpft, bis er nume no öppe so gross wie es Spielzüg-Rössli gsi isch.
Dänn hät er zum Glück ufghört, no wiiter z’schrumpfe.
„Ja, super!“ hät er gseit. „Jetzt han ich aber d’Nase voll vo eune dumme Säftli und blöde Gmües. Ich wott nöd usefinde, was süscht no alles passiert mit dem verwunschene Zügs!“
Er isch i d’Jaggetäsche vom Herr Igel ghüpft und hät gmeint: „Los! Gömmer wiiter! Mir händ scho viel z’viel Ziit da obe ufem Häxeberg verlore!“
Dä Hänger hät sich dä Sack mit dä Schrumpfrüeblis gschnappt und gmeint: „Mer weiss ja nie, öb mer die nöd doch no bruuche chönd“. Und dänn sind dä Cliff, dä Hänger und dä Herr Igel mit em Gumpi i dä Täsche dä Häxeberg wieder abegwanderet und wiiter Richtig Loretanie zoge.
„Wenn ich’s richtig in Erinnerig han, chunnt jetzt nume no s’unüberwindbare Meer und dänn simmer ändlich in Loretanie“, hät dä Gumpi us dä Täsche vom Herr Igel usegredet.
„Jetzt müemmer nume no usefinde, wie mer s‘unüberwindbare Meer chönd überwinde.“
Chönd eusi Fründe au das Problem löse?
Ihr werdets erfahre, nach eimal döse.
Cliff und Hänger – Die Logorö-Adventsgeschichte 2013
Bisher erschienen:
- 01. Es überraschends Gschänk
- 02. S’gheimnisvolle Figürli
- 03. Hallo, min Name isch Hänger
- 04. Dä Gumpi cha nüm gumpe
- 05. Vo dä Prinzässin Lea, em König Lolo und emene truurige Kerli
- 06. Jetzt chömed d’Hasepirate!
- 07. Ä Schlacht, wo eigentlich gar keini gsi isch
- 08. En Wald volle Dichte
- 09. Dä trotteligi Herr Igel
- 10. D’Giggeli-Zwerge vo dä Giggeli-Berge
- 11. Dä Schwätz-Schwabbel wird ustrickst
- 12. Jetzt gaht’s ufe und abe!
- 13. Unterwägs mit em Büüteltaxi
- 14. Dä schnäll wachsendi Mais
- 15. Es flüügends Häxehüüsli
- 16. Wärum Häxe nöd gern Spiegel händ
