Mittwoch, 18. Dezember 2013, von staromat

Es Meer wo cha rede?

„Vamos a la playa“ lautet heute das Motto bei Cliff und Hänger! Das Problem ist nur, dass unsere Freunde nicht nur zum Strand wollen, sondern auch gleich über das ganze Meer hinweg. Pack die Badehose ein und ab ins Kapitel 18!

 

Previously on Cliff und Hänger:

Nach em Sieg über d’Häx Lamontanara händ eusi Helde dä versteinereti Gumpi zum Glück wieder chöne mit emene Schrumpfrüebli zum Läbe erwecke. Leider isch er nachher nume no so gross gsi wie es Playmobil-Rössli. Und jetzt staht au no s’unüberwindbare Meer bevor!

Kapitel 18
Es Meer wo cha rede?

Es isch nöd lang gange, da sind eusi Fründe au scho am Ufer vom unüberwindbare Meer aglangt. Wie’s sich für es Meer ghört, hät mer wiit und breit keis Endi dävo gseh.

Anderscht als mer’s vo dä Feriä her kännt, isch s’unüberwindbare Meer aber scho am Ufer sehr tüüf gsi. Mer hät nöd chöne inelaufe und über d’Welle gumpe oder so ähnlichi Sache mache.

„Irgendwo det äne isch Loretanie“ hät’s us dä Täsche vom Herr Igel usetönt. „Jetzt müemmer nume no irgendwie übere cho.“

Sie händ agfange umeluege, doch wiit und breit hät’s nüt bruuchbars gha. Keis Schiff, keis Flugzüüg, keis Unterseeboot, ja nöd emal irgend es Material mit dem mer hett chöne es Floss baue.

„Was isch mit Schwümme?“ hät dä Hänger gmeint, doch wer scho mal es Meer gseh hät, dem isch klar, dass das nöd unbedingt dä bescht Vorschlag gsi isch.

Hilflos und enttüscht sind die vier am Ufer entlang gloffe. Cha das si, dass ihri Reis würklich da jetzt ihres Ändi findet? Das isch doch nöd möglich!?!

„Blöds, dumms Meer!“ hät dä Herr Igel gseit und hät en Stei vom Bode ufgläse und wiit use is Meer gworfe.

„Aua!“

Meer

Dä Cliff, dä Hänger, dä Herr Igel und dä Gumpi i dä Täsche händ sich verwirrt agluegt. Aua? Wie gaht dänn das?

Jetzt hät au dä Cliff en Stei gnah und en is Meer use gschosse.

„Aua!“

Scho wieder! Es Meer wo cha rede? Jetzt isch dä Hänger a dä Reihe gsi. Au nach sim Stei isch sofort es „Aua!“ vom Meer cho.

Eusi Fründe sind völlig baff am Ufer gstande. Als erscht’s hät dä Herr Igel sini Sprach wieder gfunde.

„Ja säg emal, chasch dänn du rede?“ hät er s’Meer gfröget.

„Natürlich“, hät ä Stimm g’antwortet. „Und ich wär no froh, wenn ihr jetzt chönnted ufhöre, mir Stei a’z’rüere.“

Wo sie gnauer aneglueget händ, isch ihne klar worde, dass es gar nöd s’Meer gsi isch, wo da gredet hät, sondern ä herzigi chlini Meerjungfrau, wo jetzt ganz nöch zu ihne as Ufer gschwumme isch.

Meerjungfrau

Sofort händ eusi Fründe neui Hoffnig gschöpft! „Hoi liebi Meerjungfrau“, hät dä Cliff agfange. „Mir sind unterwägs zum d‘Prinzässin Lea vo Loretanie z‘befreie. Chasch du eus dadäbi ächt hälfe?“

„Nume, wenn ihr kei Stei meh schüssed“ hät d’Meerjungfrau zur Antwort gäh. „Aber wie chan ich eu dänn bloss hälfe? Ich bin ja nur ä chlitzechliini Meerjungfrau!“

„Mir müend irgendwie übers unüberwindbare Meer cho. Viellicht häsch du än Idee, wie mir das schaffe chönd.“

„Tuet mir leid“, hät d’Meerjungfrau gseit und däbi ganz ä truurigs Gsicht gmacht. „S’unüberwindbare Meer cha mer unmöglich überwinde. Drum heisst’s ja au unüberwindbar.“

Nach enere churze Pause hät sie agfange schmunzle und no öppis Wichtigs däzue gseit:

„Mer cha’s unüberwindbare Meer zwar nöd überwinde, unterwinde aber, das isch möglich. Ich zeig eu gern dä Wäg däfür. Chömed eifach mit mir mit.“

„Unter em Meer durelaufe?“ hät sich dä Herr Igel gwunderet. „Wie söll das dänn bitteschön gah? Isch es möglich, dass du vorher es paar Stei z’viel an Chopf übercho häsch?“

„Nume nöd z’fräch“, hät d’Meerjungfrau gmeint und hät vier chliini, wiisi Pillene as Ufer gworfe. „Nehmed die und folged mir!“

Irgendwie isch eusne Fründe das zwar überhaupt nöd ghüür gsi, will’s aber kei anderi Möglichkeit geh hät, hät jede sini Pille gschluckt und eine nach em andere sind sie zu dä Meerjungfrau is Wasser gumpet.

Werdet sie im Meer versuufe?
Morn passiert wieder ganz en huufe!

Cliff und Hänger – Die Logorö-Adventsgeschichte 2013

Bisher erschienen:

Dieser Beitrag wurde am Mittwoch, 18. Dezember 2013 um 07:07 Uhr veröffentlicht und unter Adventskalender gespeichert. Sie können Kommentare zu diesem Eintrag über den RSS-2.0-Feed verfolgen. Sie können einen Kommentar hinterlassen, Pingbacks/Trackbacks sind momentan deaktiviert.

Kommentieren