Ä unerwarteti Wändi
Es ist soweit! Der grosse Endkampf mit dem Herzog von Möhretal steht bevor! Werden unsere Freunde die Prinzessin befreien können? Eins steht fest: Der Ausgang des heutigen Kapitels dürfte wohl niemand so erwartet haben (including me; das Storyboard von Kapitel 23 stammt von der Zeichnerin!).
Previously on Cliff und Hänger:
Nach enereä furchtbar lange Reis sind dä Cliff, dä Hänger, dä Herr Igel und dä Gumpi bi dä Burg vom Herzog vo Möhretal acho. Mit enere Lischt händ sie all Häslipirate gschrumpft und imene Sack ine gfange. Jetzt staht ihne nume no dä Herzog sälber im Weg, bevor sie d’Prinzässin Lea ändlich chönd befreie!
Kapitel 23
Ä unerwarteti Wändi
Dä Herzog vo Möhretal hät sich zmitzt vor eusne Fründe ufgstellt und hät sie ganz bös aglueget. Was hät dä eint au für en zabblende Sack i dä Hand, hät er sich gfröget. Und was wänd die vier Glünggis überhaupt?
„Mir chömed go d’Prinzässin Lea befreie!“ hät dä Cliff muetig gseit.
Dä Herzog vo Möhretal hät luut agfange lache. „D’Prinzässin Lea befreie! Ha! Dä isch guet! Ihr und welli Armee bitte schön?“
Er hät guet umeglueget und gseh, dass dä Cliff, dä Hänger, dä Herr Igel und dä Gumpi würklich nur z’vierte vor ihm gstande sind.
„Gegä mini Häslipirate händ ihr kei Chance!“ hät er glachet und drü Mal luut pfiffe.
Nüt isch passiert. Dä Herzog hät nomal pfiffe, doch au das hät nüt bracht.
„Heilige Strohsack! Wo sind dänn au die blöde Hase ane?“ hät er sich ufgregt.
Dä Cliff hät sin Sack ufe ghebet. I dem ine hät’s wiiterhin fescht zabblet und mer hät es Hasegjammer ghört, dass es eim d’Ohre weh tah händ.
Jetzt hät dä Herzog begriffe, dass d’Häslipirate weggschrumpft worde sind und dass er besiegt gsi isch. Sie händ ihn gfesslet und sind schnäll zum Turm ufe go d’Prinzässin befreie. Die hät sich gfreut, chan ich eu säge! Ändlich gseht sie ihre Vater und ihres Land wieder!
Wo sie mit dä Prinzässin und em gfesslete Herzog zrugg in Loretanie gsi sind, hät sich d’Prinzässin aber z’erscht no welle umzieh.
„Ich cha doch nöd mit denä Lümpe vor min Vater ane stah“ hät sie gseit und uf ihri Gfängnis-Chleider zeiget. Dä Cliff hät gmeint, dass das ihrem Vater sicher total egal seg, dä freui sich doch so, sie wieder bi sich z’ha. Aber d’Prinzässin hät sich nöd vo ihrem Entschluss abbringe lah und hät s’schönschte rosa Chleid azoge, wo sie gha hät.
Dä König Lolo isch usser sich gsi vor Freud, wo er sini Tochter, sis Prinzässli, sini Lea, wieder hät chöne i d’Arme näh. Er hät sich gschwore, sie nie meh los’z’lah und viel besser uf sie uf’z’passe.
„Und du, Herzog vo Möhretal“, hät er zum gfesslete Gfangene gseit. „Du chunnsch jetzt is tüüfschte Loch vo ganz Loretanie! Detä wirsch du igsperrt, bis du alt und grau bisch!“
„Nei Vater!“ hät ihn d’Prinzässin Lea unterbroche.
„Ich weiss jetzt ganz genau, wie das isch, wämmer igsperrt isch!“ hät d’Lea erchlärt. „Ich bin so lang i dem Turm gfange gsi, dass ich sicher wahn-sinnig worde wär, wäri da nöd dä Herzog vo Möhretal sälber gsi! Z’erscht hät er mir amigs en Honigtoascht ufe bracht oder öppis anders z’trinke als fuuls Wasser. Dänn isch er immer länger bi mir obe bliebe und mir händ viel mitenand gschwätzt.
Er isch eigentich gar nöd eso en Böse, wie mer immer meint und wie er leider au sehr oft tuet. Sini Eltere und Grosseltere händ ihm halt immer wieder itrichteret, dass Loretanie es furchtbars Land seg und s’Möhretal s’einzig wahre Riich. So hät er das sälber afange glaube, doch bim viele Redä mit mir hät er sini Meinig über eus komplett g’änderet. Ich dänke, mir söttet ihm nomal ä Chance geh und ICH will ihm au ä söttigi geh.“
Dänn hät sie ä kurzi Pause gmacht und nachher die Wort gseit, wo dä König Lolo siis ganze Läbe nie meh vergässe wird.
„Papi, ich ha mich in Herzog vo Möhretal verliebt und will ihn hürate!“
Dä König Lolo isch natürlich baff gsi, aber will er so grossi Freud gha hät, dass sini Tochter wieder zrugg gsi isch, isch er doch irgendwie drüber weg cho und hät sini königlichi Erlaubnis für die unerwarteti Hochziit geh.
Es hät es riesigs Fäscht geh mit Musig, Tanze, Hochziitsturte, Füürwerch und allem. Natürlich sind d’Helde vo Loretanie au iglade worde: Dä Cliff, dä Hänger, dä Gumpi und dä Herr Igel.
Bevor s’Hochziitspaar i d’Flitterwuche nach Stockholm greist isch, hät d’Prinzässin Lea em Cliff no en prächtige Bluemestruss überreicht. Sie hät ihm uf jedi Bagge es Küssli geh und dä Cliff isch so entzückt gsi, dass er gar nöd glueget hät, wie er dä Bluemestruus i d’Hand gnah hät.
Ei Blueme hät ä spitzigi Dorne gha und genau mit derä hät sich dä Cliff in Duume gstoche.
„Aua!“ hät er gruefe, da isch ihm au scho wieder trümmlig worde.
Morn wird die Gschicht ihres Ändi finde!
Freued eu uf d’Wiehnacht, liebi Chinde!
Cliff und Hänger – Die Logorö-Adventsgeschichte 2013
Bisher erschienen:
- 01. Es überraschends Gschänk
- 02. S’gheimnisvolle Figürli
- 03. Hallo, min Name isch Hänger
- 04. Dä Gumpi cha nüm gumpe
- 05. Vo dä Prinzässin Lea, em König Lolo und emene truurige Kerli
- 06. Jetzt chömed d’Hasepirate!
- 07. Ä Schlacht, wo eigentlich gar keini gsi isch
- 08. En Wald volle Dichte
- 09. Dä trotteligi Herr Igel
- 10. D’Giggeli-Zwerge vo dä Giggeli-Berge
- 11. Dä Schwätz-Schwabbel wird ustrickst
- 12. Jetzt gaht’s ufe und abe!
- 13. Unterwägs mit em Büüteltaxi
- 14. Dä schnäll wachsendi Mais
- 15. Es flüügends Häxehüüsli
- 16. Wärum Häxe nöd gern Spiegel händ
- 17. Dä Gumpi wird es Spielzügrössli
- 18. Es Meer wo cha rede?
- 19. S’unüberwindbare Meer wird unterwunde
- 20. En zauberhafte Bsuech bi dä Familie Muulwurf
- 21. Die verboteni Tür
- 22. D’Häslipirate werded überlischtet
