Dä Herr Stinkfurz will sich sälber hälfe
Alle die behaupten, die Welt ginge heute unter, können gar nicht recht bekommen. Die Geschichte des Herrn Stinkfurz geht heute nämlich erst in ihr zweitletztes Kapitel und wie bitteschön soll eine Welt zugrunde gehen, auf welcher der Herr Stinkfurz seinen letzten Furz noch nicht abgegeben hat?
Dä Herr Stinkfurz will sich sälber hälfe
Obwohl dä Herr Stinkfurz zäme mit sinerä beschte Fründin, dä Frau Ichschmöckgarnüt, sehr es glücklichs Läbe gha hät, isch er glich zwüscheddure immer wieder echli truurig gsi. Wenn all Lüüt um ein ume anduurend wäge eim in Ohnmacht gheied, dänn isch das nöd grad luschtig.
Eines Tages hät dä Herr Stinkfurz a dä Bushaltistell äs ufkläbts Plakat entdeckt:
„Hast du Probleme? Melde dich bei uns!“
S’Plakat isch vonere anonüme Sälbschthilfegruppe gsi. Inere anonüme Sälbschthilfegruppe sitzt mer wie im Chindsgi oder bim Singe i dä Schuel uf Stüehl im Chreis. Nume staht uf denä Stüehl nöd „Jasmin“ oder „Julian“ druf, sondern es hät kei Näme. Dänn verzellt jede vo sine Problem und am Schluss gaht’s allne irgendwie besser.
So anonümi Sälbschthilfegruppe git’s eigentlich eher in Amerika als bi eus, aber wer weiss, viellicht spielt d’Gschicht vom Herr Stinkfurz ja au in Amerika und gar nöd bi eus.
Uf all Fäll hät dä Herr Stinkfurz dänkt, das chöni viellicht ja au ihm hälfe und er isch a sones Treffe gange. Vorher hät er extra en ganze Tag lang kei Zwieble und kei Chnoblauch gässe, dämit er i dä Gruppe nöd z’viel muess furze.
Dä Reihe na händ jetzt all ihri Problem vortreit. Als erschts hät sich dä Herr Görpsgruusig vorgstellt. Dä Herr Görpsgruusig hät fascht i jedem Satz so gruusig müesse görpse, dass niemmert meh hät welle mit ihm redä.
Dänn isch d’Frau Bisinass a dä Reihe gsi. D’Frau Bisinass hät nie gmerkt, wenn sie uf s’WC hett müesse und so hät sie immer i d’Hose brünzlet.
Dä Herr Ohreschmalz hät gjammeret, dass all Lüüt bi ihm nume immer uf d’Ohre würdet luege, will die eifach immer volle Schmalz segäd. Dänn isch er go d’Ohre putze gange.
So händ alli vo ihrne gröschte Sorge verzellt. Am Schluss isch dä Herr Stinkfurz dra gsi und will er scho so lang hät müesse s’Furze verhebä, hät er – no bevor er öppis hät chöne säge – grad losgfurzt. All andere im Chreis sind natürlich sofort in Ohnmacht gheit.
Jetzt isch dä Herr Stinkfurz würklich truurig worde. Nöd emal inerä anonüme Sälbschthilfegruppe isch sis Läbe anderscht gsi. Dä Herr Stinkfurz isch i sin Stuehl inegsunke und hät fescht afange brüele.
Nach emene Wiili sind die anderä Lüüt im Ruum wieder ufgwachet. Und dänn isch öppis ganz Sältsams passiert! Dä Herr Görpsgruusig hät nüme gruusig görpset, d’Frau Bisinass hät plötzlich gmerkt, wenn sie uf s’WC muess und dä Herr Ohreschmalz hät suuberi Ohre gha!
Nume em Herr Stinkfurz sini Fürz händ wiiterhin fürchterlich gstunke. Aber dadäfür hät er siit dem Tag gwüsst, dass er mit sine Fürz chan anderi Mänsche heile. Und das chönd nöd viel vo sich behaupte.
Der Logorö-Dödelgeschichten-Adventskalender 2012
Bisher erschienen:
- 01. Dä Herr Stinkfurz findet ä Fründin
- 02. I wett i hett es glücklichs Bett
- 03. Ä riese Schreierei
- 04. S’fuule Eichhörnli Nummere 57
- 05. Gegesiitigi Hilf hilft gegesiitig
- 06. Dä Herr Stinkfurz im Wald
- 07. Ach du Schreck!
- 08. Schriibe macht Froid
- 09. Ich ha jetzt kei Ziit
- 10. Chaos im Eichhörnliwald
- 11. Dä Herr Stinkfurz und d’Badmeischter-Party
- 12. Ä chläbrigi Gschicht
- 13. Ä langi Gschicht vom Alange
- 14. Hoppla!
- 15. S’fuule Eichhörnli macht ä Party
- 16. Dä Herr Stinkfurz gaht in Usgang
- 17. Ordnig isch s’halbe Läbe
- 18. Es schneielet, es beielet
- 19. D’Gschicht vom Ma, wo uf alles reime cha
- 20. Gsellschaft fürs fuule Eichhörnli
