Ich ha jetzt kei Ziit
Wer für die Lektüre der heutigen Logorö-Dödelgeschichte keine Zeit findet, der sollte sich diese trotzdem nehmen. Schliesslich handelt die Erzählung genau von ihm und einer Frau, die ihm helfen könnte…
Ich ha jetzt kei Ziit
Es isch emal dä Herr Ichhanjetztkeiziit gsi, dä hät es grosses Problem gha. Er hät nämlich für überhaupt nüt nie kei Ziit gha. Er hät am Morge nöd Zmorge gässe (kei Ziit), hät nachher nöd Zäh putzt (kei Ziit), dänn isch er nöd go schaffe gange (kei Ziit), hät nöd mit sine zwei Pudel Tigg und Tagg gspielt (kei Ziit) und isch am Abig nöd go schlafe (kei Ziit).
Er hät also würklich für überhaupt nüt nie kei Ziit gha. Er hät dä ganzi Tag nume immer uf sini Uhr glueget und beobachtet, wie sich dä Sekundezeiger schnell, dä Minutezeiger langsamer und dä Stundezeiger ganz langsam im Chreis drülled. Aber eigentlich hät er au für das kei Ziit gha.
Wenn mer nie für nüt überhaupt ä kei Ziit hät, dänn hät mer natürlich so ziemlich kei Fründe. Das hät dä Herr Ichhanjetztkeiziit aber nöd gstört, will für Fründe het er sowieso kei Ziit gha.
Nume ä Frau, das hetti dä Herr Ichhanjetztkeiziit scho no gern gha. Aber er hät kei Ziit gha zum drüber nadänke. Und so wär er wahrschienlich für immer ällei bliebe, wär ihm nöd d’Frau Stoppuhr über dä Wäg gloffe.
D’Frau Stoppuhr hät ä ganz spezielli Gab gha. I ihrere Nöchi händ alli Uhre sofort gstoppet und sind erscht wieder wiitergloffe, wenn d’Frau Stoppuhr nüme da gsi isch.
D’Frau Stoppuhr hät also dä Herr Ichhanjetztkeiziit voremene Kafi atroffe und no bevor sie ihn hät chöne begrüesse, hät dä Herr Ichhanjetztkeiziit nervös uf sini Uhr glueget und hät grad welle säge, dass er jetzt kei Ziit hebi, da isch er plötzlich still worde.
Dä Sekundezeiger hät sich keis bizzeli bewegt.
Dä Minutezeiger au nöd.
Und dä Stundezeiger scho grad gar nöd.
Und s’erscht Mal i sim Läbe hät dä Herr Ichhanjetztkeiziit Ziit gha – und zwar ganz viel.
Er hät mit dä Frau Stoppuhr en Kafi trunke, ja was heisst eine? Er hät grad zwei gnah und zwar Latte Macchiatos! Nachher sind sie zäme zum Herr Ichhanjetztkeiziit sinere Wohnig hei spaziert und händ detä uuu lang mit em Tigg und em Tagg gspielt. Die beide Pudel sind überhaupt nöd drus cho, was los gsi isch. Eso en entspannte Herr Ichhanjetztkeiziit händ sie no nie erläbt.
Das neue Läbe hät em Herr Ichhanjetztkeiziit so guet gfalle, dass er d’Frau Stoppuhr grad ghürate hät. Sie hät ihn nämlich au gern gha. Sie sind es Läbe lang glücklich gsi mitenand und händ siebe Chind gha. S’erschte hät Chumjetzt gheisse, s’zweite Zaggizagg, s’dritte Abernullkommaplötzli, s’vierte Hütno, s’foifte Hoppdäbäse, s’sächste Mirmüendjetztgah und s’siebte Superschnägg.
Der Logorö-Dödelgeschichten-Adventskalender 2012
Bisher erschienen:
