S’fuule Eichhörnli Nummere 57
Die heutige Advents-Dödelgeschichte erzählt von einem äusserst faulen Zeitgenossen, wie 1000 Schilder in einen Wald kommen und was man mit einer haarigen Raupe so alles anstellen kann. Viel Vergnügen.
S’fuule Eichhörnli Nummere 57
Es hät emal en Wald geh, i dem händ tuusig Eichhörnli gwohnt. Jetzt hät dä Wald ganz genau au tuusig Bäum gha und so häts i jedem Baum eis grosses Loch drin gha und i jedem Loch hät eis Eichhörnli gwohnt.
D’Eichhörnli vo dem Wald sind sich alli ununterbroche gegesiitig go bsueche. Mal isch s’einte zum andere, dänn wieder s’andere zum einte und immer so wiiter.
S’Problem isch eifach gsi, dass jede Baum i dem Eichhörnli-Wald so ziemlich tupfgenau glich usgseh hät wie alli 999 andere Bäum. So isch es immer wieder mal passiert, dass d’Eichhörnli uf em Heiweg z’erscht i öppe foif anderi Wohnige ine sind, bevor sie die eigeni gfunde händ.
Um dem abzhelfe, händ d’Eichhörnli bschlosse, dass sie Schilder mit Zahle vo 1 bis 1000 unter allne Eichhörnlis verteiled. Jedes Eichhörnli hät dänn s’Schild mit sinere Zahl näbed sin Wohnigsigang bim Baum anegnaglet und so händ sie all ä Huusnummere übercho.
S’Eichhörnli wo d’Nummere 57 übercho hät, isch es sehr, sehr fuuls Eichhörnli gsi. Es isch so fuul gsi, dass es am Morge chum vom Bett uf s’Sofa hät möge gwaggle, wo’s dänn dä ganz Tag wiiter umegläge isch. Es isch so fuul gsi, dass es zum Zähputze ä haarigi Raupe gsuecht hät und die dänn mit echli Zahpaschta druf drü Minute lang über d’Zäh flitze lah hät. Es isch so fuul gsi, dass es dä Tag uf em Wandkalender nie abgrisse hät. Bim fuule Eichhörnli isch eifach s’ganz Jahr immer dä 5. Auguscht gsi und eimal im Jahr hät das ja sogar au immer wieder emal gstumme.
S’Schild mit dä Zahl 57 isch lang bim fuule Eichhörnli i dä Wohnig umeglege. Alli Fründe vo ihm händ immer wieder gseit, es söll’s doch endlich ufhänke. Scho bald würded alli Eichhörnli im Wald ihri Nummere ufghänkt ha und nume s’fuule Eichhörnli hett dänn no kei Zahl a dä Türe.
S’fuule Eichhörnli hät ufghorchet. Alli andere händ ihri Nummere ufghänkt? Nume es sälber hät ä kei Zahl a dä Türe?
Glücklich hät s’fuule Eichhörnli s’Nummereschild unters Bett tschuutet. „Wenn alli ä Nummere a dä Türe händ, dänn wohn ich eifach im einzige Baum, wo kei Nummere dra hät! So eifach isch das!“
Und so isch es au gsi. S’fuule Eichhörnli hät – wie alli andere Eichhörnli au – ab dem Tag immer schön heigfunde und niemert isch jemals us Versehe wieder bi öper anderem inetramplet.
Der Logorö-Dödelgeschichten-Adventskalender 2012
Bisher erschienen:
