Schriibe macht Froid
Auch im heutigen Advents-Türchen finden wieder zwei Menschen zueinander, die unterschiedlicher nicht sein könnten. Dabei wird jede Menge Papier verbraucht…
Schriibe macht Froid
Es isch emal dä Herr Ichmuenimmerallesufschriebe gsi, dä hät es grosses Problem gha. Er hät nämlich immer alles müesse ufschriebe. Ich mein, ab und zue mal öppis ufschriebe, das wär ja normal, aber dä Herr Ichmuenimmerallesufschriebe hät würklich IMMER ALLES ufgschriebe.
Zum Bischpil wenn er am Morge d’Frau Fründlich uf dä Strass atroffe hät und sie ihm fründlich „Guete Morge Herr Ichmuenimmerallesufschriebe“ zuegruefe hät, so hät er zrugg gwunke und gseit „Ou, das muen ich grad ufschriebe“. Er hät en Zettel füre gnah und druf itreit: „Mäntig, Viertel ab Nüni, Frau Fründlich grüesst fründlich.“
Oder wenn bi ihm im Büro sin Chef, dä Herr Nörgeligäggs, zu ihm gseit hät: „Herr Ichmuenimmerallesufschriebe, chönd Sie mir bitte no ufschriebe, wer vorher aglüte hät und was er hät welle?“, so hät dä Herr Ichmuenimmerallesufschriebe gseit „Ou, das muen ich grad ufschriebe“ und hät uf en Zettel gschriebe: „Mittwuch, Zäh vor Zähni, Herr Nörgeligäggs will, dass ich ufschriebe, wer wegen was angelütet hat.“
Und nachher hät er dänn no würklich ufgschriebe, wer wäge was aglüte hät.
Dä Herr Ichmuenimmerallesufschriebe isch an und für sich sehr glücklich gsi i sim Läbe. Er hät immer glueget, dass er gnueg Papier und mindischtens drü funktionierendi Schriiber mit däbi gha hät. Einzig mit dä Fraue hät das nöd so funktioniert. Die sind ihm immer wieder dävo gloffe, will er eigentlich die ganzi Ziit immer nume öppis am Ufschriibe gsi isch.
Eines Tages hät er inere Papeteri d’Frau Ichliesesogernhanaberalleswosgitschodrümalgläse troffe. Nume scho wo er ihre Name ghört hät, händ d’Äugli vom Herr Ichmuenimmerallesufschriebe afange lüchte. Uiuiuiuiui hät er dänkt, a dem Name chan mer ja ganz lang schriebe. Und d’Frau Ichliesesogernhanaberalleswosgitschodrümalgläse isch natürlich au begeischteret gsi, wo sie gmerkt hät, dass dä Herr Ichmuenimmerallesufschriebe immer alles ufschriebt. Ändlich hät sie so viel zum Läse gha, wie sie hät welle!
Sie händ sofort ghürate und sind s’Läbe lang glücklich gsi mitenand. Sie händ siebe Chind gha. S’erschte hät Bleistift gheisse, s’zweite Chugelschriiber, s’dritte Wandtafle, s’vierte Taschtatur, s’foifte Blattpapier, s’sächste Büechergstell und s’siebte Läsibrülle.
Der Logorö-Dödelgeschichten-Adventskalender 2012
Bisher erschienen:
