Es schneielet, es beielet
Wer sich in diesen Tagen fragt, wo denn der ganze schöne Schnee draussen hingekommen ist, der könnte in der heutigen Advents-Dödelgeschichte eine Antwort finden…
Es schneielet, es beielet
Es isch emal dä Herr Ichissimmerallnedäganzschneeäweg gsi, dä hät es grosses Problem gha. Er hät nämlich immer allne dä ganz Schnee äweg g’ässe. Für ihn sälber isch das zwar eigentlich gar keis Problem gsi. Schnee hät ihm guet gschmöckt und Hunger hät er immer gha. Aber für anderi Lüüt isch das alles doch sehr unglücklich gsi.
Am liebschte hät dä Herr Ichissimmerallnedäganzschneeäweg nämlich dä Schnee i Form vo Schneemanne gha. Die händ immer so fein nach Rüebli gschmöckt. Mer cha sich vorstelle, wie d’Chinder agfange händ z’brüele. Da bausch dä ganz Tag amene Schneema und dänn chunnt eine däher und frisst en dir eifach äweg! Git’s ja gar nöd! Überall wo dä Herr Ichissimmerallnedäganzschneeäweg verbi cho isch, hät’s glätschet und plääret.
Au d’Schiigebiet händ Angscht gha vor em Herr Ichissimmerallnedäganzschneeäweg. Wenn er amigs sini Schiiferie in Davos verbracht hät, händ’s detä nöd emal me chöne Iishockey spiele, will denä hät er au grad no s’Iis äweg gschläcket. Und Schiifahre häsch grad ganz chöne vergässe. Dä Herr Ichissimmerallnedäganzschneeäweg hät sich am Afang vo sine Schiiferie amigs äs Lätzli umbunde und isch öppe drü Tag lang go Ässe gange, bis alli Berge nume no grüen gsi sind. Dänn isch er fürs Dessert vor ä Schneekanone ghocket und hät s’Muul ufgmacht.
Es hät sich überhaupt kei Lösig abzeichnet und die Gschicht wär ganz übel usecho, hetti dä Herr Ichissimmerallnedäganzschneeäweg nöd d’Frau Ichwottsganzjahrgolfspiele känneglernt. D’Frau Ichwottsganzjahrgolfspiele hät s’ganz Jahr welle Golf spiele. Im Früehlig, im Summer und im Herbscht isch das überhaupt keis Problem gsi. Im Winter aber hät sie pro Rundi Golf jedes Mal öppe 85 Golfbölle verlore, will sie diä wiisse Dinger im Schnee eifach nüme gfunde hät.
Und will das irgendwänn is Gäld gaht, hät sie sich mit em Herr Ichissimmerallnedäganzschneeäweg verabredet. Als Träffpunkt hät dä Herr Ichissimmerallnedäganzschneeäweg s’Freestyle in Züri vorgschlage. S’Freestyle, das isch en Alass, wo irgendwelchi wahnsinnigi Jungi mit Schii und Snouboards über ä riesigi Schneesprungschanze gumped. „Det han ich sowieso scho immer mal ane welle“, hät dä Herr Ichissimmerallnedäganzschneeäweg gseit und s’Wasser isch ihm scho im Muul zämegloffe.
Was will mer säge? S’Freestyle isch i dem Jahr ziemlich schnäll beendet gsi. Ohni Schanze chasch eifach nur schlächt gumpe. Em Herr Ichissimmerallnedäganzschneeäweg hät aber d’Frau Ichwottsganzjahrgolfspiele so guet gfalle, dass er ab detä jede Winter mit ihre umegreist isch und überall immer dä ganz Schnee vo dä Golfplätz äweg g’ässe hät. Und will d’Frau Ichwottsganzjahrgolfspiele pauselos Golf gspielt hät, isch ihm kei Ziit meh bliebe, um no andere Schnee äweg z’ässe. So sind au all Chind und d’Schigebiet wieder glücklich gsi.
Dä Herr Ichissimmerallnedäganzschneeäweg hät d’Frau Ichwottsganzjahrgolfspiele ghürate und sie sind äs Läbe lang glücklich gsi mitenand. Sie händ siebe Chind gha. S’erschtä hät Rieseslalom gheisse, s’zweite Flocke, s’dritte Iglu, s’vierte Schlitte, s’foifte Schiilift, s’sächste Schneeglöggli und s’siebte Bernhard Russi.
Der Logorö-Dödelgeschichten-Adventskalender 2012
Bisher erschienen:
- 01. Dä Herr Stinkfurz findet ä Fründin
- 02. I wett i hett es glücklichs Bett
- 03. Ä riese Schreierei
- 04. S’fuule Eichhörnli Nummere 57
- 05. Gegesiitigi Hilf hilft gegesiitig
- 06. Dä Herr Stinkfurz im Wald
- 07. Ach du Schreck!
- 08. Schriibe macht Froid
- 09. Ich ha jetzt kei Ziit
- 10. Chaos im Eichhörnliwald
- 11. Dä Herr Stinkfurz und d’Badmeischter-Party
- 12. Ä chläbrigi Gschicht
- 13. Ä langi Gschicht vom Alange
- 14. Hoppla!
- 15. S’fuule Eichhörnli macht ä Party
- 16. Dä Herr Stinkfurz gaht in Usgang
- 17. Ordnig isch s’halbe Läbe
