Chaos im Eichhörnliwald
In der heutigen Logorö-Adventsgeschichte begeben wir uns wieder in den Wald der Tausend Eichhörnchen und schauen, was das faulste Exemplar dieser Gattung so alles anstellt…
Chaos im Eichhörnliwald
Nachdem im Tuusig-Eichhörnli-Wald all Eichhörnli ihri Wohnige mit Nummereschilder agschriebe händ und nume s’fuule Eichhörnli als einzigs imene Baumloch ohni Nummere gwohnt hät, isch bekanntlich Rueh ikehrt im Tuusig-Eichhörnli-Wald.
Doch irgendwie hät’s all Eichhörnli gnervt, dass jedäs vo ihne hät müesse es Türschild anenagle und nume s’fuule Eichhörnli eifach gar nüt hät müesse leischte. So händ sie sich heimlich troffe und ganz en gemeine Plan usgheckt!
Amene Morge isch s’fuule Eichhörnli vo sim Baum abeklätteret und echli go spaziere gange. S’Nachbars-Eichhörnli, wo das dur es chliises Loch i sim Baum beobachtet hät, hät drü Mal luut uf sini Nüsslitrummele gschlage. Das isch s’Signal für alli andere Eichhörnli gsi.
All zäme händ ihri Nummereschilder vo dä Bäum weggnah und sind sich husch husch hinter em gröschte Baum im Wald go verstecke. 999 Eichhörnli hinter eim einzige Baum! Das hät dänn es Gedränge gäh, huiuiui, au wenn’s würklich ganz en grosse Baum gsi isch.
Uf all Fäll isch s’fuule Eichhörnli irgendwänn vom Spaziere zrugg cho und hät i sini Wohnig welle. Es hät ufeglueget und s’Baumloch ohni Nummereschild gsuecht. Will aber kein einzige Baum meh äs Schild dra gha hät, isch es völlig verdutzt stah bliebe und nüme drus cho.
„Ha ha!“ händ ufs Mal die andere Eichhörnli gruefe und sind hinter em grosse Baum füre cho. Sie händ giggelät und gaggsät, so fescht händ sie sich gfroit, dass ihre Plan funktioniert hät. Sie händ em fuule Eichhörnli erchlärt, dass sie ihm hebäd welle ä Lektion erteile und sie drum extra alli ihri Schilder weggnah hebäd.
S’fuule Eichhörnli hät churz überleit und dänn langsam drü Mal i d’Händ klatscht. „Super. Ihr händ mich drigleit. Gratuliere. Das wird mir ä Lehr si. ICH aber fröge mich, wie dänn IHR jetzt wieder i EUI Wohnige finde wänd.“
Die andere Eichhörnli händ sich aglueget. Jedes hät sis Nummereschild i dä Händ gha. Sie händ im Wald umeglueget. 1000 Bäum mit 1000 Löcher, wo all jetzt wieder tupfgenau glich usgseh händ. Es isch sehr still worde im Wald.
Dänn isch es chliises Eichhörnli uf en Baum klätteret, churz im Loch verschwunde und wieder usecho. 999 Eichhörnli händ gspannt ufeglueget. „Da wohn ich nöd!“ hät’s chliine Eichhörnli verzwiiflet abegruefe.
Sofort sind all Eichhörnli losgflitzt! Hei, hät das äs Durenand gäh! Überall sind Eichhörnli i Wohnige ine, wieder use cho und händ „Da wohn ich nöd!“ gruefe. Im ganze Wald hät’s stundelang vo überall her tönt: „Da wohn ich nöd! Da wohn ich nöd! Da wohn ich nöd!“
S’fuule Eichhörnli hät sich’s am Bode bequem gmacht und gwartet, bis nach langer Ziit ändlich all Eichhörnli ihri eigeni Wohnig wieder gfunde händ. Sofort händ all ihri Nummereschilder ganz fescht und für immer agnaglet.
Dänn hät s’fuule Eichhörnli gmüetlich dä einzig Baum gsuecht, wo no immer kei Nummere dra gha hät, isch i sini Wohnig klätteret und hät dä Fernseh igschtellt. „3 Nüsse für Aschenbrödel“ isch grad gloffe. S’fuule Eichhörnli isch ufs Sofa gläge und glücklich igschlafe.
Der Logorö-Dödelgeschichten-Adventskalender 2012
Bisher erschienen:
