Ordnig isch s’halbe Läbe
Mit der heutigen Dödelgeschichte sollte endlich ein wenig Ordnung in den Logorö-Adventskalender kommen. Viel Spass mit den Abenteuern der Frau Ichmuenimmerallespüschele!
Ordnig isch s’halbe Läbe
Es isch emal d’Frau Ichmuenimmerallespüschele gsi, die hät es grosses Problem gha. Sie hät nämlich immer alles müesse püschele. Sie hät dä ganzi Tag alli mögliche Sache ufgruumet, sortiert und igordnet und dänn wieder neu sortiert, igordnet und wieder ufgruumet.
Churz: Sie isch nie fertig worde mit püschele.
Sie hät es Grätli gha, mit dem hät sie all ihri Sache chöne aschriebe. Sie hät zum Bischpil „Früehstücksflocke“ itöggelet und dänn isch en chline Streife usecho, wo „Früehstücksflocke“ druf gstande isch. Dä hät sie dänn uf d’Packig mit dä Früehstücksflocke kläbt.
Im Huushalt vo dä Frau Ichmuenimmerallespüschele isch alles agschriebe gsi. ALLES! D’Läbesmittel, d’Spielsache, d’Chleider, ja sogar ihres Zahbürschteli isch mit „Zahbürschteli“ agschriebe gsi.
Eimal hät sie alli Büecher im Gstell nach dä Azahl Siitene sortiert und igordnet. D’Büecher bis 50 Siite hät sie z’underscht ane tah, 50 bis 75 Siite im Regal drüber, 75 bis 100 no eis höcher und immer so wiiter. Natürlich hät sie alli Regal dementsprächend agschriebe.
Ächli spöter hät sie dänkt, das machi doch kei Sinn, wenn da es Chinderbuech zwüsched emene Chochbuech und enere Gspängschtergschicht versorget isch, nume will die Büecher per Zuefall alli gliichvill Siitene händ. Und – zägg! – hät sie alles nach em Buechinhalt sortiert agordnet. Und neu agschriebe.
Mit so Sache hät d’Frau Ichmuenimmerallespüschele ihri ganze Täg verbracht. Und s’krasse isch gsi: die Frau isch total glücklich gsi däbi!
Nume d’Manne, die sind dä Frau Ichmuenimmerallespüschele reihewiis dävo gloffe. Sie hät sich amigs, wenn sie en Ma känneglärnt hät, ein bis zwei Tag chöne zämeriisse, doch dänn hät sie agfange d’Blueme wo sie übercho hät, nach dä Farbene z’sortiere oder d’Männer händ uf ihrne Schueh plötzlich ufdruckti Streife vorgfunde: „Schueh linggs“ und „Schueh rächts“.
Das hät keine lang usghalte. Nöd eine!
Doch dänn hät d’Frau Ichmuenimmerallespüschele dä Herr Ichfindnienüt känneglernt. Dä Herr Ichfindnienüt hät nie nüt gfunde. Ui, hät dä gstrahlet, wo er dä Huushalt vo dä Frau Ichmuenimmerallespüschele s’erscht Mal gseh hät. Alles isch a sim Platz gsi und alles hät mer jederziit immer gfunde, wämmer’s gsuecht hät. So öppis hät er no nie erläbt gha!
Dä Herr Ichfindnienüt isch so begeischteret gsi vo dä Frau Ichmuenimmerallespüschele, dass er sie grad ghürate hät (d’Frau Ichmuenimmerallespüschele hät i dä Chile die ufgstellte Heilige-Figure nach dä Grössi sortiert und dä Herr Ichfindnienüt hetti d’Ring nie im Läbe meh gfunde, wenn d’Frau Ichmuenimmerallespüschele sie ihm nöd vorher extra is Jagget-Täschli inegnäht hetti). Sie sind äs Läbe lang glücklich gsi mitenand und händ siebe Chind gha. S’erschte hät Ordner gheisse, s’zweite Übersicht, s’dritte Organisation, s’vierte Disziplin, s’foifte Tuduulischte, s’sächste Putzfimmel und s’siebte Frau Staromat.
Der Logorö-Dödelgeschichten-Adventskalender 2012
Bisher erschienen:
- 01. Dä Herr Stinkfurz findet ä Fründin
- 02. I wett i hett es glücklichs Bett
- 03. Ä riese Schreierei
- 04. S’fuule Eichhörnli Nummere 57
- 05. Gegesiitigi Hilf hilft gegesiitig
- 06. Dä Herr Stinkfurz im Wald
- 07. Ach du Schreck!
- 08. Schriibe macht Froid
- 09. Ich ha jetzt kei Ziit
- 10. Chaos im Eichhörnliwald
- 11. Dä Herr Stinkfurz und d’Badmeischter-Party
- 12. Ä chläbrigi Gschicht
- 13. Ä langi Gschicht vom Alange
- 14. Hoppla!
- 15. S’fuule Eichhörnli macht ä Party
- 16. Dä Herr Stinkfurz gaht in Usgang
