Ä chläbrigi Gschicht
Zur Feier der Logorö-Advents-Dödelgeschichten-Halbzeit kleben wir zwei Gestalten zusammen, die besser nicht zueinander passen könnten.
Ä chläbrigi Gschicht
Es isch emal dä Herr Ichchläbimmerallesuf gsi, dä hät es grosses Problem gha. Er hät nämlich immer alles ufkläbt. Er hät immer zwei Chübel Liim däbi gha und egal, was er grad gfunde hät, er hät’s – zägg! – a die nächschti Wand, an nächschte Baum oder as nächschte Huus kläbt. Wo’s grad Platz gha hät zum öppis anechläbe.
Bi ihm dihei i dä Wohnig isch überhaupt nüt meh zum Bruche gsi. All Tassli händ am Chuchischrank kläbt, all Bleistift uf em Computerbildschirm, all Zahbürschteli uf em Badzimmerspiegel. Mängisch händ ihm d’Lüüt neui Sache bracht, aber er hät immer grad sini Chübel Liim gholt und hät die gschänkti Waar sofort wieder noimet anekläbt.
Schlimm isch es gsi, wo dä Herr Ichchläbimmerallesuf eimal anere Chinderchrippe verbi gloffe isch. D’Chind händ im Garte gspielt und dä Herr Ichchläbimmerallesuf hät nöd anderscht chöne, als dass er grad drü vo denä Chind a die nöchscht Plakatwand kläbt hät. Huiuiui, händ die zabblet und goisset, bis sie vo d ä Chrippe-Frauene wieder vo dä Wand gchnüblet worde sind.
Das Ganzi hetti bös g’ändet, wär em Herr Ichchläbimmerallesuf nöd eines Tages d’Frau Ichissimmeralleliim über dä Wäg gloffe. D’Frau Ichissimmeralleliim hät nämlich immer alle Liim wo sie hät chöne finde, rübis stübis ewäg g’ässe.
Wie sich die beide troffe händ? Ich verzell’s eu: Dä Herr Ichchläbimmerallesuf hät grad welle zwei Banane a d’Wand chläbe (obwohl er eigentlich ganz fescht Hunger gha hät und die Bananene lieber gässe hett), da hät er plötzlich vo dusse es riesigs Gschrei ghört. Er hät sini Liimchübel uf dä Chuchitisch gstellt und zum Feischter us glueget.
Dusse isch ä hübschi chlini Frau emene Plakatufchläber nagrännt. Dä hät nämlich grad welle es paar Plakat ufchläbe und hät für das en grosse Chübel Liim däbi gha. D’Frau hät ganz luut „Yammi! Yammi!“ gruefe und hät sofort agfange, dä armi Ma schreiend z’verfolge. Sie hetti ihn vermuetlich au nächschtens igholt, hetti sie nöd durs Chuchifeischter vom Herr Ichchläbimmerallesuf däm sini Liimchübel uf em Tisch gseh.
„Mampfi! Mampfi!“ isch ihre s’Wasser im Muul zämegloffe. Sie hät sofort aghalte und isch interessiert ganz nöch as Feischter ane cho. Dä Herr Ichchläbimmerallesuf isch so verwirrt gsi vo dem Ganze, dass er eini vo dä Banane, wo er eigentlich hät welle ufchläbe, gedankeverlore i sis Muul gstopft und gässe hät.
D’Frau Ichissimmeralleliim hät höflich gfröget, öb sie dörfti em Herr Ichchläbimmerallesuf sin Liim ässe.
Und dä Herr Ichchläbimmerallesuf hät nöd protestiert. Im Gegeteil. Er hät nume mit em Chopf gnickt und dä Frau Ichissimmeralleliim sini beide Liimchübel und äs Lätzli durs Feischter use geh.
Er hät nämlich immer no dä feini Gschmack vo dä Banane im Muul gha und so hät er dä Frau Ichissimmeralleliim au öppis möge gönne.
Sie sind gueti Fründe worde, dä Herr Ichchläbimmerallesuf hät jetzt viel weniger Sache ufkläbt, will er meischtens kei Liim meh gha hät und d’Frau Ichissimmeralleliim hät trotzdem immer gnueg Liim zum Ässe gha, will dä Herr Ichchläbimmerallesuf gliich immer wieder isch go Liim poschte.
Sie händ ghürate und sind äs Läbe lang glücklich gsi mitenand. Sie händ siebe Chind gha. S’erschte hät Pritt gheisse, s’zweite Uhu, s’dritte Tesa, s’vierte Scotch, s’foifte Chleischter, s’sächste Harz und s’siebte Zweikomponäntechläber.
Der Logorö-Dödelgeschichten-Adventskalender 2012
Bisher erschienen:
- 01. Dä Herr Stinkfurz findet ä Fründin
- 02. I wett i hett es glücklichs Bett
- 03. Ä riese Schreierei
- 04. S’fuule Eichhörnli Nummere 57
- 05. Gegesiitigi Hilf hilft gegesiitig
- 06. Dä Herr Stinkfurz im Wald
- 07. Ach du Schreck!
- 08. Schriibe macht Froid
- 09. Ich ha jetzt kei Ziit
- 10. Chaos im Eichhörnliwald
- 11. Dä Herr Stinkfurz und d’Badmeischter-Party
