Dä Herr Stinkfurz und d’Badmeischter-Party
Heute reist Herr Stinkfurz nach Italien. Und wer meint, der Herr Stinkfurz würde in seinen Ferien weniger furzen, der hat sich gewaltig verrochen…
Dä Herr Stinkfurz und d’Badmeischter-Party
Eimal sind dä Herr Stinkfurz und d’Frau Ichschmöckgarnüt zäme uf Italie as Meer i d’Ferie gange. Während d’Frau Ichschmöckgarnüt no im Zelt gschlafe hät, isch dä Herr Stinkfurz ganz früeh am Morge scho as Meer gange go Muschle sammle.
Will er so früeh drah gsi isch, isch er ganz ällei am mänscheleere Strand gsi. Ei Muschle isch prächtiger als die ander gsi und dä Herr Stinkfurz hät gstrahlet vor Freud. Wo er sich grad nach emene speziell schöne Exemplar buckt hät, hät er ganz fürchterlich müesse furze. Und dänn isch es passiert!
Zum erschte Mal i sim Läbe isch dä Herr Stinkfurz vo sim eigene Furz in Ohnmacht gheit.
Er isch in füechte Sand gheit und d’Wälle händ ihm immer wieder Wasser übers Gsicht gspüelt.
En Badmeischter hät das gseh und isch sofort z’ränne cho. „Was fallt Ihne eigentlich i?“ hät er uf Italienisch gseit. „So nöch am Strand im Wasser z’liege! Das isch doch gföhrlich! Sie chönted ja ver…“
Wiiter isch er nüme cho. Dä Furz vom Herr Stinkfurz hät immer no so fescht gstunke, dass dä Badmeischter au grad in Ohnmacht und näbed em Herr Stinkfurz i d’Wälle gheit isch.
Wo das en andere Badmeischter gseh hät, isch au er ganz ufgregt anegrännt. „Gaht’s eu eigentlich no!“ hät er gruefe. „Eifach so im Wasser z’liege, das gaht doch…“
Paff! Isch au er ohnmächtig is Wasser gheit.
Das hät wieder en Badmeischter gseh und wo dä dänn au is Wasser gheit isch, hät das grad nomal en andere Badmeischter gseh. Und so wiiter und so fort. Irgendwänn sind 534 Badmeischter näbed em Herr Stinkfurz im Wasser gläge. Dä isch us sinere Ohnmacht ufgwacht und isch zrugg zu dä Frau Ichschmöckgarnüt is Zelt gange. Bi so vielne Badmeischter im Wasser findt mer ja gar kei Muschle meh, hät er sich beklagt.
D’Badmeischter sind 20 Minute spöter au ufgwacht und händ kei Ahnig meh gha, wie sie alli da ane cho sind. Will aber grad scho mal so viel Badmeischter mitenand zäme am Strand gsi sind, händ sie spontan die gröschti Badmeischter-Party gfiiret, wo Italie je gseh hät.
Der Logorö-Dödelgeschichten-Adventskalender 2012
Bisher erschienen:
