Z S V G
Schlussspurt in der Logorö Adventsgeschichte 2017! Und wie in der Vorweihnachtszeit üblich, geschieht auch hier alles voller Hektik und Stress! Wie soll man so bloss einen verliebten Prinzen erlösen können?
Previously on 2’000 Schöfli:
Um dä verliebti Prinz vo sim Liebes-Zauber z’erlöse, sueched eusi Fründe nach dä Häx Gundula. Ä heissi Spur füehrt sie nach Knatterstadt.
Kapitel 22
Z S V G
Knatterstadt isch ä rächt grossi, hektischi Stadt gsi. Überall hät’s gratteret und knatteret. D’Bewohner sind uf dä Strasse immer grännt, nöd eine hät sich Ziit gnah, für eusi Fründe churz a’z’halte und ihne ihri Frage nach dä Gundula z’beantworte. Ja selbst für d’Küss vom verliebti Prinz hät niemmert Ziit gha. D’Lüüt sind so schnell a ihm verbi grännt, dass dä Prinz ihne nie meh hät chöne säge als: „Hallo Sie! Sie gfalled mir sehr! Ich lieb…“ – und scho sind sie wieder weg gsi.
Wo’s langsam Abig worde isch, hät euses Trüppli erschöpft unter emene Baum am Stadtrand en Raschtplatz gsuecht. Sie händ alli am Baumstamm aglehnt und nöd emal dä Prinz hät meh möge, dä Baum z’umarme. Da isch plötzlich öppis Merkwürdigs a ihne verbi gloffe.
En Zwerg uf Stelze.
Dä Furunkulus hät sich ufgrafft und dä Zwerg öppis welle fröge, doch dä hät nume nervös abgwunke: „Kei Ziit, dä Herr! Kei Ziit! Ich muess i d’Disco!“
Und no bevor dä kurrligi Zwerg in Richtig Waldrand verschwunde isch, isch scho dä nächschti Zwerg uf Stelze a ihne verbi gwagglet. „Muess i d’Disco! Tuet mer leid. Kei Ziit! Muess i d’Disco!“
Em Mit isch ufgfalle, dass bi beide Zwerge s’gliiche uf dä Stelze druf gschriebe gsi isch. Und zwar vier Buechstabe:
Z S V G
„ZSVG? Was söll dänn das heisse?“
Und scho isch wieder en Zwerg a ihne verbi düst. Au er uf Stelze. Und au uf denä Stelzä isch „ZSVG“ druf gstande.
„Ab i d’Disco! Kei Ziit! Kei Ziit! Bin sicher scho z’spaht!“
Will alli Zwerge ihne kei Antwort geh händ, ja nöd emal richtig mit ihne gredt händ, händ eusi Fründe echli en gemeine Plan usgheckt. Sie händ es Stuck Wulle vom Schöfli sim Fell abgschnitte, dä Furunkulus hät äs Spinnrad anezauberet und so händ sie en dünne Fade us dä Schöfliwulle gspunne. Dä Fade händ’s jetzt zwüsched zwei Bäum knotet, so dass er öppe i 20 Zentimeter Abstand vom Bode über em Wäg gspannt gsi isch.
Ä Stolperfalle!
Und wo dä nächscht Zwerg uf Stelze a’z’ränne cho isch, isch es passiert:
„Muen i d’Disco. Kei Ziit! Hopp! Hopp! HOPPLA!“
Patsch! isch dä Zwerg vor ihne uf d’Nase gheit.
En Zwerg isch gfange, weiss er meh?
Morn scho Chinde, werdet ihr’s gseh!
Dä Mit und sini 2’000 Schöfli – Die Logorö-Adventsgeschichte 2017
Alle bisherigen Türchen unter:
