Hundertein Witz und eis Schöfli
Jetzt wird’s lustig in der Logorö Adventsgeschichte 2017! Wie kann man bloss einen riesigen Drachen besiegen? Nichts einfacher als das. Man benötigt dafür bloss über hundert möglichst flache Witze und ein einziges fluffiges Schaf.
Previously on 2’000 Schöfli:
I dä Burg vom Drache Fürliburz träffed eusi Fründe uf d’Anila, s’Schöfli Nr. 768 und dä Zauberer Furunkulus. Dä Drache isch grad dra, sini Gfangene uf’z’frässe, da erinnered sie sich dra, was ihne d’Chatz Tupflimupf gseit hät: Dä Drache hät gern churzi Witz und mer muess ihn am Hals chützle.
Kapitel 19
Hundertein Witz und eis Schöfli
Dä Drache Fürliburz hät s’Muul wieder zue gmacht und s’muetige Heinzelmännli gspannt aglueget. „En Witz? Du kännsch en Witz? Also guet, verzell mer din Witz. Aber wehe, er isch lang! Ich hasse nüt meh als langi Witz!“
„Was isch orange und lauft über d’Berge?“ hät s’Heinzelmännli gfröget. No währenddem dä Drache überleit hät, hät s’Heinzelmännli d’Antwort scho sälber geh: „Es Wanderinli!“
Dä Fürliburz hät d’Antwort ghört, hät aber nöd glachet. Er hät studiert, was am Wanderinli dänn söll luschtig si, da hät scho s’nächschte Heinzelmännli sin Witz verzellt:
„Was isch farbig und rennt uf em Tisch immer dävo? En Fluchtsalat!“
Dä Drache, wo no immer bim Wanderinli nöd drus cho isch, hät dä Chopf echli tüüfer abeghebt und scho sind die nächschte Witz cho:
„Was isch schwarz-wiis und springt vo Iisscholle zu Iisscholle? En Springuin!“ – „Was isch bruun und sitzt hinter Gitter? Ä Knastanie!“
Jetzt händ d’Heinzelmännli Vollgas geh:
„Was isch dunkelgrüen und hockt immer uf em WC? En Kacktus!“ – „Was isch grüen und versteckt sich vor dä Polizei? En Essig-Schurke!“ – „Was isch fluffig und bislet vom Baum abe? Es Seichhörnli!“ – „Wer isch bruun, chnusprig und lauft mit emene Chorb dur dä Wald? S’Brotchäppli“ – „Was isch gross, grau und hät immer en Hörer i dä Hand? En Telifant!“
Em Fürliburz isch schwindlig worde. Sin Chopf isch immer wiiter zum Bode abe cho. Und wiiter händ d’Heinzelmännli ihri Witz verzellt:
„Was isch rosa und schwümmt im Wasser? Ä Meerjungsau!“ – „Was isch grüen und haut immer gege all Türe? En Chlopfsalat!“ – „Was macht ‚Muh‘ und hilft bim Stiefel azieh?“ En Chuelöffel!“ – „Was isch sehr gsund aber immer beleidigt? Es Schmollkornbrot!“ – „Was isch bruun, zäch und flügt i dä Nacht umenand? Ä Lädermuus!“ – „Was wachst i dä Erde und stinkt fürchterlich? Ä Furzle!“ – „Was hät en Zylinder und isch nie dräckig? En Sauberer!“
Dä Fürliburz hät nüme gwüsst, was mit ihm passiert. All 100 Heinzelmännli händ jetzt ihri Witz verzellt und dä Chopf vom Drache isch scho fascht am Bode unde gsi. D’Heinzelmännli händ dä Mit aglueget! „Los Mit! Verzell au en Witz! No ein Witz und mir händ en! No ein Witz! Los Mit!“
Dä Mit hät churz überleit. Dänn hät er dä Drache gfröget: „Was passiert, wenn mer en blaue Turnschueh is rote Meer wirft?“
Em Fürliburz hät alles drüllet im Ruum. S’Schöfli Nr. 768 isch ihm us dä Chlaue gheit und dä Drache isch druf und dra gsi, mit em Chopf uf dä Bode z’tätsche.
Da hät dä Mit d’Chance erchännt. S’Schöfli 768 isch hinter em Drache gstande, d’Heinzelmännli und dä Mit grad vor ihm.
„Chum zu mir, Schöfli! Schnell!“ hät dä Mit gruefe und zack! isch s’Schöfli 768 unter em Drache dure uf dä Mit zue grännt. Dadäbi isch es mit sinere Wulle em Drache an Hals cho und hät ihn so g’chützlet.
Dä Fürliburz hät afange giggele und lache! Er hät sich am Bode drüllt vor Lache. Hi und her hät er sich g’chugelet. Plötzlich hät’s Puff! gmacht und imitte vo ganz viel Rauch und Näbel isch astell vom Drache Fürliburz en wunderschöne Prinz am Bode ghocket. Dä hät verwirrt um sich ume glueget und isch überhaupt nüm drus cho.
Es hät sich usegstellt, dass dä Prinz vor langer Ziit vo dä Häx Gundula in Drache Fürliburz verzauberet worde isch und nume hät chöne erlöst werde, wenn ihn öpper am Hals chützlet. Was s’Schöfli Nr. 768 soebe grad gmacht hät.
Sie händ d’Anila und dä Furunkulus us em Chäfig befreit. Dänn hät dä Prinz dä Mit und d’Heinzelmännli dankbar aglueget. „Ihr sind die Beschte! Danke viel Mal! Das wird ich eu nie vergässe! Endlich bin ich kein böse Drache meh! Danke! Danke! Danke! Aber eis würd mich scho no interessiere, liebe Mit, was passiert dänn jetzt, wenn mer en blaue Turnschueh is rote Meer wirft!“
„Ganz eifach“, hät dä Mit gschmunzlet.
„Er wird nass.“
Ja isch das jetzt ächt scho dä Schluss?
Oder chunnt die Gschicht morn nomal in Schuss?
Dä Mit und sini 2’000 Schöfli – Die Logorö-Adventsgeschichte 2017
Alle bisherigen Türchen unter:
