Im Schloss vo dä Tupflimupf
Heute sind wir zu Besuch bei einer gelangweilten Katze. Da braucht es schon den äusserst furiosen Auftritt eines Protagonisten, um ihr die gewünschten Informationen zu entlocken. Vorhang auf für Holperstolpers haarige Performance!
Previously on 2’000 Schöfli:
Will dä Mit und d’Heinzelmännli kei Ahnig händ, wie sie dä Drache Fürliburz besiege chönd, wänd sie d’Chatz Tupflimupf um Rat bitte. Doch die hilft eim nume, wenn mer sie zum lache bringt. Für das gönd sie schnell s’hundertschte Heinzelmännli go hole, dä Holperstolper.
Kapitel 17
Im Schloss vo dä Tupflimupf
Dä Holperstolper hät sich riesig gfreut, wo die andere Heinzelmännli hei cho sind. Er isch ihne entgege grännt, aber dadäbi natürlich grad über sini Füess gstolperet und – Patsch! – vor allne uf dä Bode gfloge.
„Das isch genau dä richtig!“ hät sich dä Mit gfreut und sie händ em Holperstolper ihre Plan erchlärt.
„Also“, hät dä Holperstolper zämegfasst. „Ihr wänd vo dä Chatz Tupflimupf än Idee, wie mer dä Drache Fürliburz chan besiege, dämit ihr d’Anila, s’Schöfli und dä Furunkulus chönd befreie. Und dämit die Chatz eu öppis verzellt, söll ich eifach es paar Mal vor ihre uf d’Schnurre gheie?“
„Ja, aber nöd extra!“ händ die andere Heinzelmännli gseit. „Süscht funktioniert’s sicher nöd.“
„Ihr mached eu doch nur über mich luschtig“, hät dä Holperstolper beleidigt gseit, hät sich umdrüllt und welle dävo laufe. Er hät jedoch nöd glueget, wo ane dass er lauft und so isch er prompt – Boing! – i d’Türe vomene Heinzelmännlihus ine gloffe. Jetzt hät sogar er sälber müesse schmunzle. „Also, guet. Versueche chönd mer’s ja.“
Und so sind sie all zäme zu dä Chatz Tupflimupf gange. Die hät imene uralte Schloss gwohnt und zwar im oberschte Turmzimmer. Sie isch uf emene alte, verstaubte Sofa gläge und hät scho ganz es graus Fell gha, wo übersäht gsi isch mit wunderschön lüchtende, blaue Tupfe.
„Du meine Güte, so viel Heinzelmännli ufs Mal!“ hät d’Tupflimupf müed usgruefe. „Und däzue no en chliine Bueb! Was wänd ihr dänn all vo mir?“.
„Mir würded gern en guete Plan ha, wie mer dä Drache Fürliburz chan besiege“, hät dä Mit gseit.
D’Chatz Tupflimupf hät sich abdrüllet. „Das isch mir viel z‘ langwiilig. Nöd luschtig. Gäääähn!“
„Aber mini Schwöschter und dä Furunkulus und…“
Doch d’Chatz Tupflimupf isch scho uf em Sofa igschlafe. Da hät dä Mit no so fescht chöne jammere.
„Lass mich mal mache“, hät dä Holperstolper gseit. Er hät am Mit verbi welle zum Sofa laufe, hät aber mit eim Fuess bim Mit sim Bei ighänkt und isch grad nach vorne gstürzt. Mit Müeh und Not hät er sich chöne a dä einte Sofalehni hebä, isch dänn aber abgrutscht. Dä Holperstolper isch umgheit und hät dadäbi vom alte Sofa beide Bei uf einere Siite abbroche. S’Sofa isch mit dä lingge Siite uf dä Bode tätscht und d’Chatz Tupflimupf, wo ab dem Lärm ufgwachet isch, isch us em Sofa gspickt und grad uf d’Zipfelmütze vom Holperstolper gfloge.
D’Heinzelmännli und dä Mit händ all gspannt dem grosse Uftritt vom Holperstolper zuegluegt. Doch es isch no wiiter gange.
Dä Holperstolper hät welle sini Zipfelmütze abzieh, wo d’Chatz Tupflimupf druf festkrallt gsi isch. Doch statt nur d’Zipfelmütze ab’z’zieh hät er au grad no sini kruslete, schwarze Haar mit abglüpft!
„Du häsch ä Perügge?“ händ all Heinzelmännli mitenand verblüfft usgruefe. Vor ihne isch dä jetzt glatzchöpfigi Holperstolper gstande.
„Ja. Ich han mir letschti bim Guetzlibache alli Haar verbrännt. Das chan ja mal passiere, oder?“ Er hät d’Perügge wieder welle azieh, hät aber us versehe d’Chatz Tupflimupf uf dä Chopf tah und agfange d’Perügge näbed sich z’streichle.
„Ufhöre! Ufhöre!“ hät d’Chatz Tupflimupf gruefe. Sie hät sich vor Lache dä Buuch ghebet.
„Holperstolper, du bisch dä Bescht!“ hät sie lachend gseit. „So guet han ich mich scho lang nüme unterhalte! Ich hilfe eu gern! Losed ganz guet zue. Ich känne die einzig Möglichkeit, wie mer dä Drache Fürliburz chan besiege.“
Ja wie nur wie cha mer das mache?
Wie besiegt mer bloss en Drache?
Dä Mit und sini 2’000 Schöfli – Die Logorö-Adventsgeschichte 2017
Alle bisherigen Türchen unter:
