En Tollpatsch wird wichtig
Einen Drachen zu besiegen ist kein leichtes Unterfangen. Da braucht es manchmal Unterstützung von allen Seiten! Sogar von jemandem, von dem man am wenigsten Hilfe erwarten würde, weil er sich selbst schon ständig in Schwierigkeiten bringt.
Previously on 2’000 Schöfli:
Dä Mit befreit d’Heinzelmännli us em Gfängnis vo dä Kobolde und erfahrt vo ihne, dass dä Drache Fürliburz sini Schwöschter, d’Anila, und s’Schöfli Nr. 768 entfüehrt hät!
Kapitel 16
En Tollpatsch wird wichtig
Dä Mit hät dä Heinzelmännli verzellt, dass das Meitli, wo dä Drache Fürliburz gstohle heb, sini Schwöschter, d’Anila, segi und er au s’Schöfli und dä Zauberer känni. Natürlich würd er dä Heinzelmännli sofort hälfe, dä fürchterlichi Drache z’besiege!
Doch, wie besiegt mer so en Drache?
D’Heinzelmännli händ nöd würklich en Plan gha. Eis hät vorgschlage, all Heinzelmännli sölled mitenand uf dä Drache ufegumpe und irgendeis vo ihne chönnt en dänn scho erwürge oder so öppis ähnlichs.
Es anders Heinzelmännli hät gmeint, mer chönnt em Drache doch ä derart langwiiligi Gschicht verzelle, dass er uf dä Stell ischlafe und nie meh ufwache würd.
Es dritts hät d’Idee gha, ganz ä tüüfi Grueb z’grabe und dä Drache det ine z’locke. Aber es hät dänn grad sälber gmerkt, dass sin Plan nöd dä bescht gsi isch, will Drache ja flüge chönd und dä Fürliburz drum eifach wieder selber us dä Grueb use flattere chönnt.
Jetzt hät s’ältischte Heinzelmännli s’Wort ergriffe: „Mini Fründe, eso chömed mer nöd wiiter. Es bliebt eus nüt anders übrig, als d’Chatz Tupflimupf um Rat z’bitte“.
„Wer isch dänn d’Chatz Tupflimupf?“ hät dä Mit gfröget. „Das wird ja immer besser mit derä Gschicht.“
„D’Chatz Tupflimupf isch ä gschiedi, uralti Chatz. Die hät so öppis wie dä 7. Sinn. Das heisst, sie ahnt Sache, wo passiered, im Vorus und chan ein so ganz guet berate. S’einzig Problem isch, dass eim die Chatz nume hilft, wenn mer sie so richtig fescht zum Lache bringt.“
D’Heinzelmännli händ sich aglueget. Wer chönnt dänn die Chatz bloss zum Lache bringe?
Dänn händ sie plötzlich all mitenander die gliich Idee gha: „Natürlich! Dä Holperstolper!“
„Dä Holperstolper? Wer isch dänn das?“
D’Heinzelmännli händ em Mit verzellt, dass sie eigentlich 100 Heinzelmännli seged und nöd 99. Dä hundertschti vo ihne seg ebä dä Holperstolper. Das seg so en grosse Tollpatsch, wo sich immer selber über d’Füess gheit, dass sie ihn meischtens dihei lönd, wenn sie öppis unternäh würded. Au jetzt seg er als einzige i ihrem Dorf bliebe.
„Also los!“ hät dä Mit usgruefe. „Holed mer dä Holperstolper und bringed mer die Chatz zum lache!
Und scho nach enere halbe Tagesreis sind sie im Dorf vo dä Heinzelmännli acho, wo sie vom Holperstolper freudig begrüesst worde sind.
En Tollpatsch hilft eus us dä Patsche?
Morn tuet das Gschichtli wiiter quatsche!
Dä Mit und sini 2’000 Schöfli – Die Logorö-Adventsgeschichte 2017
Alle bisherigen Türchen unter:
