En Plan gaht i d’Hose
Heute kommen nicht weniger als 99 neue Figuren in die Logorö Adventsgeschichte 2017! Und mit ihnen ein grandioser Plan! Dieser ist dermassen ausgefeilt und perfekt, dass er unmöglich funktionieren kann. Schafe määähen und Shit happens.
Previously on 2’000 Schöfli:
Uf dä Suechi nach em Grüenling wird dä Mit vo dä foif Kobolde us em Finschterwald mit gfange gno! Isch er jetzt für immer verlore?
Kapitel 14
En Plan gaht i d’Hose
Mit gröschter Astrengig hät dä Mit versuecht, sich vo dem blöde Fangnetz z’befreie, doch er hät kei Chance gha.
Wo er kei Chraft meh gha hät, händ ihn die foif Kobolde packt und i ihri Höhli treit. Sie händ ihn in en Art Gfängnis gworfe, in en chliine Ruum i dä Höhli, wo sie mit emene grosse Stei verschlosse händ. Det ine isch es würklich stockfinschter gsi. Dä Mit hät versuecht, öppis z’erchänne, aber es isch ussichtslos gsi.
Immer wieder hät’s um ihn ume graschlet und gchrablet. Dä Mit hät aber überhaupt nöd chönne gseh, wer oder was das Grüsch verursacht hät. Es isch viel z’dunkel gsi.
Hoffentlich sind das bloss kei Rattene, hät er dänkt.
Da isch em Mit in Sinn cho, dass er ja glaub’s no d’Stirnlampe vom Schöfli Nr. 768 irgendwo i sim Rucksack ine gha hät. Die hät er am erschte Tag vo sinere Reis vom Schöfli dörfe uslehne und dänn i sim Rucksack versorgt.
Dä Mit hät a s’Schöfli Nr. 768 dänkt, a sini Schwöschter d’Anila, an Zauberer Furunkulus, ja au a sini Eltere d’Anelim und dä Nibor. So wiit wie jetzt i derä finschtere Höhli isch er no nie vo ihne ewäg gsi.
Das muess sich aber hurtig ändere, hät er sich gseit und schnell d’Stirnlampe vom Schöfli Nr. 768 füre gnah und sie azündet.
Z’erscht hät er es Ziitli lang grad gar nüt gseh, bis sich sini Auge as helle Liecht gwöhnt händ.
Und dänn hät dä Mit gseh, dass es kei Rattene gsi sind, wo um ihn ume graschlet händ.
Im Höhlegfängnis vo dä foif Kobolde sind 99 Heinzelmännli igsperrt gsi. Alli 99 sind sie vom Rotling gfange und i die Höhli gworfe worde (natürlich wäg ihrne rote Chappene).
D’Heinzelmännli sind schüli verschrocke ab dem grelle Liecht. Aber sie händ schnell gmerkt, dass die Stirnlampe ä super Chance für d’Flucht us dä Höhli chönnti sie. Sofort händ sie em Mit ihre Plan verzellt.
Immer am Namitag am Drü würdi ihne dä Rotling öppis z’ässe i d’Höhli bringe. Wenn er s’nächschte Mal cho würd, söll dä Mit ihn mit dä Taschelampe blände und dänn chönnted sie alli use ränne.
Und so händ’s es au gmacht. Wo dä Rotling dä schweri Stei vor dä Gfängnis-Höhli weggrollt und es Tablett mit 100 Teller voll Gulaschsuppe bracht hät, isch dä Mit zack! füregsprunge und hät em Rotling mit sinere Schöfli-Stirnlampe zmitzg is Gsicht glüchtet.
„Gopfridstutz was isch dänn das!“ hät dä Kobold usgruefe und pätsch! isch ihm s’Tablett mit dä feine Gulasch-suppe abegheit. Sofort händ d’Heinzelmännli und dä Mit am Rotling welle verbi ränne.
Doch sie händ nöd dämit grächnet, dass dä Rotling en supercoole Kobold gsi isch. Drum hät er immer ä Sunnebrülle däbi gha und die hät er jetzt au sofort azoge!
Die schnelli Flucht hät nöd welle si?
Morn gaht’s wiiter, das isch scho gli!
Dä Mit und sini 2’000 Schöfli – Die Logorö-Adventsgeschichte 2017
Alle bisherigen Türchen unter:
