Panik uf em Winterfäscht
Die Hälfte der Logorö Adventsgeschichte 2017 ist heute durch und das soll gebührend gefeiert werden! Ein Winterfest steht an, mit allem was zu einer tollen Party gehört. Nur leider kommt eine Person zu viel hinzu. Kriminelle Energie im Advent! Wo gibt’s denn so was? Hier!
Previously on 2’000 Schöfli:
Uf dä Suechi nach emene eigene Schaf hät dä Mit sini Schwöschter Alina, dä Zauberer Furunkulus und au s’Schöfli Nr. 768 verlore. Trotzdem entschlüsst er sich, mit dä violette Summervögel a ihres Winterfäscht z’gah.
Kapitel 12
Panik uf em Winterfäscht
Obwohl dä Mit nonig so güebt gsi isch mit Flüge, hät er die andere Summervögel schnell uf’gholt.
„Wo ane flüge mer überhaupt?“ hät er d’Violetta gfröget.
„7 Kilometer gradus, dänn 18 Meter ufe, 25 Minute nach links und no es bizzeli im Chreis ume. Dänn simmer detä.“
„Wo detä?“
„Im Winterpalascht vom Königriich Summeropolis! Wo mir alli eusi Winterfäscht fiiret.“
Und würklich. Nach 7 Kilometer gradus, 18 Meter duruf, 25 Minute links und no chli im Chreis ume sind die acht Summervögel – oder besser gseit, die siebä Summervögel und dä Mit – imene herrliche Winterpalascht glandet. Alles isch us Iis gsi, alles hät gfunklet und glitzered! I dä Mitti vomene Iisgärtli isch en prächtige Tannebaum gstande, wunderschön gschmückt. Es isch ä wahri Pracht gsi.
Nume em Mit sini schöne Flügel sind grad nach dä Landig wieder furt gsi, was er sehr schad gfunde hät. Die hett ich sehr guet wieder emal chöne bruuche, hät er dänkt. Wenn zum Bischpiel d’Anila mir na rännt, will ich sie wäge irgendöppisem verruckt gmacht han, dänn wäred so Flügel sehr praktisch.
Wo dä Mit a sini Schwöschter Anila dänkt hät, isch er grad wieder echli truurig worde.
Doch dänn sind vo überall her no meh Summervögel z’flüge cho. Blaui, gelbi, grüeni, roti. Ja, es hät Summervögel i allne Farbe gha. S’Winterfäscht isch losgange!
Es hät ä Summervogel-Bänd gha, wo fätzigi Musig gspielt hät. En Summervogel-Zauberer, wo vo Gast zu Gast gfloge isch und chlini Trickli vorgfüehrt hät. Es hät feins z’Ässe und z’Trinke gäh. All händ sich wohl gfühlt, händ tanzt, gsunge und mitenander gschwätzt. Es isch s’schönste Fescht gsi, wo dä Mit bis jetzt je erläbt hät.
Bis öpper gruefe hät: „Hey! Wo isch dänn dä Tannebaum ane cho?“
Und würklich! Dä Tannebaum i dä Mitti vom Iispärkli isch weg gsi!
„Mir sind bestohle worde! Hilfe! Es isch en Dieb unter eus! Fehlt süscht no öppis?“
Alli händ sofort ihri Sache kontrolliert. Und würklich! Näbed em Tannebaum sind no folgendi Sache gstohle worde:
Ä leeri Wiifläsche, ä Gurke, es ufblasbars Krokodil, ä Kermit-Puppe, en Chopfsalat…
Unter dä Summervögel isch Panik usbroche und all sind wild durenander gflatteret. „Mir müend dä Dieb fange. Er isch sicher da dure abghaue!“ – „Nei, er isch detä weg grännt!“ – „Nei, da hinde isch er dävo gschliche!“
„Halt!“ hät dä Mit gruefe und alli Summervögel sind sofort zur Rueh cho und händ ihn gspannt aglueget.
„Halt. Mir müend das gschiider agah. Känned ihr die drü Fragezeiche? Nöd? Also, das sind drü gschiidi Detektive und die lösed all ihri Fäll mit Vernunft und guetem Nahdänke. Und nöd mit wild umenander flattere und ume schreie. Also. Die Sache wo gstohle worde sind, müend irgend en Zämehang ha. Was händ dänn die Sache gmeinsam?“
En Tannebaum, ä Wiifläsche, ä Gurke, es Plastik-Krokodil, ä Kermit-Puppe, en Chopfsalat.
Irgendöppis müend sie eifach gmeinsam ha.
„Grüen! Sie sind alli grüen!“ hät d’Violetta gruefe.
Da händ sie gmerkt, dass au all grüene Summervögel verschwunde sind.
Und sofort händ all gwüsst, wer dä gemeini Dieb gsi isch:
„Dä Grüenling! Natürlich! Dä Grüenling isch es gsi!“
Öb d’Summervögel dä Dieb chönd fange?
Morn gaht’s wiiter, tüend nöd plange!
Dä Mit und sini 2’000 Schöfli – Die Logorö-Adventsgeschichte 2017
Alle bisherigen Türchen unter:
