Summervögel im Winter
Das heutige Kapitel der Logorö Adventsgeschichte 2017 steht ganz im Zeichen von Monty Pythons Motto „And now to something completely different“. Warum das so ist? Lest’s am besten selber! Wir befinden uns nämlich schon fast in der Mitte des Films.
Previously on 2’000 Schöfli:
Dä Zauberer Furunkulus überlischtet d’Häx Gundula und zauberet alli Schaf wieder gross. Inere riese Explosion verjagt’s wäge dem s’ganze Häxehuus. Doch plötzlich findet sich dä Mit ganz ällei zmitzg i 1’999 Schöfli wieder!
Kapitel 11
Summervögel im Winter
„Anila! Furunkulus! Schöfli 768! Wo sind ihr?“
Dä Mit hät nach sinere Schwöschter und sine neue Fründe gschroue und gschroue, doch es isch ussichtslos gsi. Überall um d’Trümmer vom Häxehuus ume sind Schöfli gstande, händ Gras gfrässe und gmäääääht.
Und zmitzt drin dä Mit. Ganz ällei.
Doch plötzlich hät er gmerkt, dass er gar nüme ällei gsi isch (abgseh vo dä viele Schöfli natürlich).
Um dä Mit ume sind siebä wunderschöni, violett lüchtendi Summervögel gflatteret. Dä gröschti vo ihne isch vor dä Mit anegfloge und hät sich vorgstellt:
„Hoi Mit, ich bin d’Violetta. Was schreisch du da so umenand?“
Dä Mit hät dä Violetta alles verzellt. Vom Schnarchdipfuus, vom Furunkulus, vom verchehrte Gärtli, vo dä Häx Gundula, vom grosse Kawumm! Eifach alles.
D’Violetta hät ufmerksam zueglost. Wo dä Mit mit sinere Gschicht fertig gsi isch, hät sie ihn aglächlet und gseit: „Mir sind s’violette Gschwader vo dä Summervögel und gönd grad a euses jährliche Winterfäscht. Chunnsch mit?“
Dä Mit hät d’Welt nüm verstande. „Aber Violetta, jetzt han ich dir doch grad alles verzellt. Ich muess mini Schwöschter sueche und dä Furunkulus und s’Schöfli Nr. 768. Ich chan doch jetzt nöd an es Winterfäscht gah!“
„Ach Mit, du bisch en Joggel!“, hät d’Violetta gsüfzget. „Das isch doch ä Adventskalendergschicht und hüt isch erscht dä 11. Dezämber! Und will Adventskalendergschichte immer 24 Kapitel händ, häsch du also no fascht zwei Wuche Ziit, zum dini Fründe z’finde. Da wird doch so es chliises Winterfäscht locker no drin liege. Also? Chunnsch mit?“
„Ou ja!“ händ die andere sächs violette Summervögel mitenand gruefe. „Mit chum mit! Mit chum mit!“
„Also guet“, hät dä Mit mit emene schlechte Gwüsse gseit. „Ich chume mit!“
Und zack! sind all Summervögel scho losgfloge. Dä Mit hät no welle rüefe, dass sie Witzbolde seged. Wie söll er dänn mitcho, er chöni ja gar nöd flüge.
Da hät er gmerkt, dass uf sim Rugge wie us em nüt use zwei wunderschöni violetti Flügel gwachse sind. Er hät churz mit ihne gflatteret zum echli in Üebig z’cho und dänn isch er dä andere Summervögel na gfloge.
Dä Mit chunnt mit!
Dä Mit gaht mit, aber wohi?
Nur eimal schlafe und ihr erfahred’s scho gli!
Dä Mit und sini 2’000 Schöfli – Die Logorö-Adventsgeschichte 2017
Alle bisherigen Türchen unter:
