Kawumm!
Jetzt wird’s explosiv in der Logorö Adventsgeschichte 2017. Die Hexe hat ihr Ziel erreicht und alle 2’000 Schafe zusammen für ihre Düngermaschine. Doch sie verbrennt sich dabei nicht nur ihre Finger, nein, heute geht noch viel mehr in die Brüche.
Previously on 2’000 Schöfli:
D’Häx Gundula wott us allne 2’000 Schöfli Häxebaumdünger mache! 1’999 Schaf hät sie scho i ihre Määäädrescher 2’000 inegstopft, als letscht’s chunnt jetzt no s’Schöfli Nr. 768 dra!
Kapitel 10
Kawumm!
Wo d’Häx Gundula nach dä 1’999 andere Schaf hät welle s’Schöfli Nr. 768 in Määäähdrescher 2000 ine stopfe, isch ihre klar worde, dass das Schöfli ja gar nonig minimisiert gsi isch und dass es i dä normale Grössi natürlich überhaupt kei Platz i dä Düngermaschine ine gha hät.
Jetzt isch es aber ebä so, dass Häxe eigentlich so guet wie alles chönd häxe und zaubere – mit einere einzige Usnahm: sie chönd kei Schöfli minimisiere. Das isch en Trick, wo sie eifach nöd anebringed. Au d’Gundula hät scho sehr viel verschiedeni Zaubersprüch usprobiert. Und d’Schöfli, a denä sie die Sprüch usprobiert hät, händ sich dänn amigs scho sehr veränderet. Mal isch ne die ganz Wulle abgheit, mal händ’s spitzigi Haseohre übercho und eimal händ’s nüme chöne ufhöre z’furze. Alles isch passiert mit denä Schöfli. Nume chliiner worde, das sind sie nie.
Drum hät d’Gundula sich ja au so gfreut, wo sie vor es paar Tag gseh hät, dass dä Furunkulus die 2’000 Schaf vom Buur Schnarchdipfuus minimisiert hät. Sie hät sie gstohle und sofort in Määäähdrescher 2000 inegstopft. Dä hät dänn aber nöd funktioniert und d’Fehlermäldig „Error 1’999“ azeigt, was soviel heisst wie: es fehlt no eis Schaf.
Jetzt hät sie 2’000 Schaf gha, aber eis dävo isch no z’gross gsi.
„Mach mer das sofort chliiner!“ hät sie em Furunkulus befohle. „Süscht häx ich em Mit und dä Anila aber sowas vo je 20 Nase is Gsicht, dass sie nüme zum Schnüüze us chömed!“
Dä Furunkulus hät churz überleit und sich dänn gschlage geh. „Also guet. Du lasch mer kei anderi Wahl.“
Er hät sin eigene Zauberstab füre gnah und so tah, wie wenn er mit dem uf’s Schöfli Nr. 768 zeige würd – tatsächlich aber hät er uf dä Määäähdrescher 2000 zielt, beziehigswiis uf die 1’999 i dä inne quetschte Schöfli. Dänn hät er mit tüüfer Stimm sin Zauberspruch gseit:
Hokus Pokus Krötendreck
Spinnenmist und Schlangenspeck
Salamanderohren, Katzengeister
Schrumpelfeigen, Zaubermeister
Was klein ist jetzt, das bring mit Glück
zur richtigen Grösse sofort zurück!
Bevor d’Gundula irgendöppis hät chöne mache, sind alli 1’999 Schöfli im Määäähdrescher 2000 wieder uf die richtig Grössi zrugg gwachse. Das hät natürlich weder die komisch Düngermaschine usghalte no s’ganze Häxehuus überhaupt.
Kawumm! hät’s gmacht und alles isch explodiert!
Dä Määäähdrescher 2000.
Dä Zauberstab-Häxebaum.
S’ganze Häxehuus.
Alles.
Eusi Fründe sind plötzlich imitte vo 2’000 normal grosse Schaf gläge. Überall hät’s gmääääht und blökt. Es isch ä wahri Freud gsi.
Nume d’Häx Gundula hät brüelend es paar kaputti Äscht vo ihrem Zauberstab-Häxebaum ufgläse. Sie hät die verbrochene und verbogene Äscht lang i ihrne Händ umedrüllt und ganz genau aglueget. Dänn hät sie sie achtlos weggschmisse und trotzig gseit: „So macht das alles kein Spass meh! Ich will nüme länger ä Häx si!“
Und dänn isch sie dävo gloffe und mer hät sie bis hüt nie meh gseh.
Dä Mit hät sich riesig gfreut, dass sie all 2’000 Schöfli händ chöne rette. Jetzt muess dä Furunkulus nume no alli Schöfli – und natürlich au dä Mit und d’Anila – wieder zrugg uf d’Weid vom Buur Schnarchdipfuus zaubere und alles wird wieder guet.
Doch wo isch dä Furunkulus überhaupt?
Und wo isch d’Anila?
Überall um ihn ume hät’s nume Schöfli gha.
Kei Anila.
Kein Furunkulus.
Und au s’Schöfli Nr. 768 hät dä Mit i allne andere Schaf ine eifach nöd chöne finde.
Ja wo sind dänn bloss jetzt alli ane?
Hät die Gschicht ä riese Panne?
Dä Mit und sini 2’000 Schöfli – Die Logorö-Adventsgeschichte 2017
Alle bisherigen Türchen unter:
