Dä Määäähdrescher 2000
Heute erfährt man endlich, was die Hexe Gundula genau mit ihren 2’000 Schafen anfangen will. Und warum Hexen Hexen stets dasselbe schenken. Und weshalb Schafe und Hexen niemals wirklich gute Freunde werden können.
Previously on 2’000 Schöfli:
Nachdem dä Mit und sini Begleiter d’Häx Gundula im verchehrte Gärtli gstellt händ, hät d’Hex plötzlich s’Schöfli Nr. 768 entdeckt und sich unheimlich da drüber gfreut!
Kapitel 9
Dä Määäähdrescher 2000
No bevor eusi Fründe irgendöppis händ chöne mache, hät d’Häx Gundula s’Schöfli Nr. 768 packt und so fescht unter ihrem Arm iklämmt, dass es sich nüm hät chöne befreie, so fescht’s au gstramplet hät.
„Endlich han ich alli! Alli 2’000 Schaf! Jetzt isch mini Zauberstab-Ernte doch no grettet!“
„Moment!“ hät dä Furunkulus gruefe. „Was söll jetzt das scho wieder heisse? Redsch immer no alles verchehrt oder chömed mir süscht nöd drus?“
„Ach das blöde verchehrte Gärtli“, hät d’Häx Gundula gseit und mit emene chline Wink vo ihre hät sie dä ganz Garte eifach weg’g’häxt. Sie sind jetzt alli zäme plötzlich im Huus vo dä Häx gstande. Alles isch dräckig und ver-staubt gsi. I dä Mitti vom Ruum isch en grosse Bluemetopf gschtande und i dem ine isch en riesige Baum gwachse, dä isch mit sine Äscht bis zum Dach vo dä Häxehütte ufe cho. Die Äscht sind aber alli ziemlich am lampe gsi und dä ganz Baum hät alles andere als gsund usgseh.
Grad näbed em Häxebaum isch es Chäfig gstande und det drin händ eusi Fründe alli 1’999 minimisierte Schöfli entdeckt.
„Dörf ich vorstelle? Min Zauberstab-Häxebaum“, hät d’Gundula stolz gseit. „Ich weiss, er gseht nöd grad fit us im Moment, aber das isch nume will ich min Superdünger nöd han chöne herstelle. Mir hät ebe ei Zuetat gfehlt. Aber das gseht jetzt ganz anderscht us!“
Zfriede hät d’Häx s’Schöfli Nr. 768 aglueget.
„Was häsch du mit eusem Schöfli vor?“ hät dä Mit gruefe.
„S’Gliiche wie mit dä andere 1’999 Schöfli!“ hät d’Häx g’jublet. Die chömed jetzt all i min Määäähdrescher 2000 ine. Sobald dä nämlich mit 2’000 Schaf gfüllt isch, startet er automatisch und vermixt all Schöfli zumene perfekte Dünger, mit wellem ich min Zauberstab-Häxebaum wieder gsund chan mache. Und das isch au bitter nötig! Us dä Äscht vo dem Baum stell ich nämlich Zauberstäb her und jetzt, wo dänn bald Wiehnachte isch, chömed d’Häxe scho gli vo überall her zu mir und chaufed neui Zauberstäb zum verschänke. Häxe schänked sich nämlich all Jahr nüt anders als Zauberstäb. Das muess aber au so si, will d’Würkig vo jedem Zauberstab immer nume genau eis Jahr lang ane hebet. Dänn bruuched d’Häxe wieder neui Zauberstäb.“
Nachdem sie alles erchlärt hät, hät d’Gundula alli 1’999 minimisierte Schöfli us em Chäfig i ihri komischi Düngermaschine ine gstopft und hät sich dänn gnüsslich em Schöfli Nr. 768 zuegwändet.
„Und jetzt no s’letschte Schöfli! Ab in Määäähdrescher 2000 mit dir!“
Müend d’Schöfli würklich s’Läbe lah?
Morn gaht’s wiiter, bliibed dra!
Dä Mit und sini 2’000 Schöfli – Die Logorö-Adventsgeschichte 2017
Alle bisherigen Türchen unter:
