Dä Zauberer Furunkulus
Heute kommt’s zum ersten kleinen Showdown in der Logorö Adventsgeschichte 2017! Unsere drei Freunde treffen auf den Zauberer Furunkulus! Doch statt einem grossen Geballere heisst’s erstmal: Abwarten und Tee trinken.
Previously on 2’000 Schöfli:
Die ganzi Herde vom Schöfli Nr. 768 isch vom Zauberer Furunkulus entfüehrt worde! Dä Mit und d’Anila wänd zäme mit em Schöfli Nr. 768 go hälfe gah.
Kapitel 5
Dä Zauberer Furunkulus
Nachdem dä Mit, d’Anila und s’Schöfli Nr. 768 nume scho drü Schritt gloffe sind, händ sie scho wieder müesse ahalte. S’Liecht vo dä Strasselaterne isch jetzt weg gsi und sie sind im Stockdunkle gstande.
„Keis Problem. Määäääääh“, hät s’Schöfli gseit und ä Stirnlampe us sim Buuchtäschli gnah. Die Stirnlampe hät sich s’Schöfli uf dä Chopf gschnallt und scho händ die drü wie en chliine Schiiwerfer vor sich gha.
Dänn sind sie losgloffe und so lang marschiert, bis es Morge worde isch und sie endlich d’Weid vom Buur Schnarchdipfuus erreicht händ.
D’Weid isch vollkomme leer gsi. Alles isch total still gsi. Nume usem Buurehof vom Buur Schnarchdipfuus hät mer es luuts Schnarchle ghört.
Dä Mit, d’Anila und s’Schöfli Nr. 768 sind bis zu dä Schlucht gloffe, wo s’Schöfli denä beide die kaputti Brugg hät welle zeige, die Brugg, wo alli Schöfli übere gange sind.
Doch statt dä Überrescht vo dä zerstörte Brugg händ sie völlig überrascht ä topmoderni neui Brugg entdeckt, wo über d’Schlucht gfüehrt hät. Die Brugg hät i allne Farbe blinkt und ä cooli Musig isch us irgendwelche Luutsprecher usecho.
D’Musig isch unterbroche worde und ä agnehmi Frauestimm hät afange rede.
„Herzlich Willkomme, liebe Mit, liebi Anila und liebs Schöfli Nr. 768 uf dä neue Superbrugg vom Zauberer Furunkulus. Er freut sich riesig, eu drü uf dä andere Siite persönlich z’begrüesse.“
Vorsichtig sind eusi Fründe uf d’Brugg gloffe. Chum sind sie druf gstande, hät sie wie es Förderband afa laufe. Sie händ gar nüt meh müesse mache und scho sind sie uf die anderi Siite übere transportiert worde.
Detä sind sie vomene alte Ma empfange worde. Dä hät echli usgseh wie dä Grossvater vom Heidi (ihr wüssed scho, welli Heidi, oder? Die mit em Geissepeter).
„Hoi zäme“, hät dä alti Ma sie begrüesst. „Ich bin dä Zauberer Furunkulus und ihr müend mir hälfe. Jetzt nehmed mer aber z’erscht mal zäme ä heissi Tasse Tee und dänn verzell ich eu, was mit dä 1’999 Schöfli passiert isch, wo zu mir über d’Brugg cho sind.“
Ja isch dänn dä Furunkulus gar nöd bös?
Ich hoffe, s’Warte uf morn macht eu nöd nervös!
Dä Mit und sini 2’000 Schöfli – Die Logorö-Adventsgeschichte 2017
Alle bisherigen Türchen unter:
