Ä Fondue-Spur is Verderbe
Im vierten Türchen des Logorö Adventskalenders 2017 taucht zum ersten Mal das Böse auf! Liebe Schäfchen, nehmt euch gut in acht! Der Zauberer Furunkulus hat euch ein Fondue mit gebracht!
Previously on 2’000 Schöfli:
Uf dä Suechi nach emene eigene Schaf träffed dä Mit und d’Anila uf s’Schöfli Nr. 768, wo dringend ihri Hilf bruucht.
Kapitel 4
Ä Fondue-Spur is Verderbe
S’Schöfli Nr. 768 hät em Mit und dä Anila ganz nervös verzellt, was passiert isch. Es ghöri em Buur Schnarchdipfuus, dä wohni ganz wiit usse ufere Weid. Näbed ihm hebis detä no 1’999 anderi Schaf. Sie seged eigentlich dä ganzi Tag immer ällei dusse und am Abig würded sie vo sälber in Stall gah. Dä Buur Schnarchdipfuus würdi ebe – genau wie’n’er heisst – dä ganzi Tag (und natürlich au i dä Nacht) immer schnarchdipfuuse.
Am Endi vo ihrere Weid hebis ä tüüfi Schlucht und über die würdi nume ei einzigi Brugg füehre. Dä Buur Schnarchdipfuus hebi allne Schöfli sträng verbote, über die Brugg z’gah. Uf dä andere Siite segi s’Land vom böse Zauberer Furunkulus und dä well mer lieber nöd känne lerne.
So händ sich d’Schöfli immer dra ghalte. Sie sind am Tag uf d‘ Weid, am Abig in Stall und nie über die verboteni Brugg gange. Nie.
Doch geschter am Morge seged plötzlich ganz viel Fondue-Stückli uf dä Brugg gläge. Immer wieder seg es Stuck Brot mit feinem verloffnigem Chäs drüber am Bode gläge, dänn ein Meter nüt und nachher wieder es Fondue-Stückli. Es hebi usgseh wie e Spur.
E Spur über d’Brugg!
So wiit d’Schöfli hebed chöne gseh, so wiit hebis Fondue-Stückli gha. Und vermuetlich no wiiter! Und dänn seg Folgendes passiert:
„Määääääh“ hebi eis Schöfli gseit und seg s’erschte Brotstückli go ässe.
„Määääääh“ hebi drufabe es anders Schöfli gmacht und seg s’zweite Stückli go schnappe, wo scho e chli wiiter uf dä Brugg gläge seg.
„Määääääh Määääääh Määääääh Määääääh Määääääh“ hebed plötzlich alli Schöfli gruefe und hebed sich uf d’Brugg drängelet und zwängelet. Immer wiiter seged sie über d’Brugg und plötzlich seged alli Schöfli dänne gsi. Uf em Land vom böse Zauberer Furunkulus!
Kaderabummchlöpftätsch heb’s dänn plötzlich gmacht. D’Brugg seg zäme tätscht und alli Schöfli hebed nüme zrugg chönne.
Alli ussert s’Schöfli Nr. 768. Es sälber seg no ganz ällei uf dä Weid vom Buur Schnarchdipfuus gstande.
„Dänn bisch du i dem Fall nöd über d’Brugg, will du gschieder gsi bisch als die andere Schöfli und gmerkt häsch, dass das mit dä Fondue-Stückli ä Falle gsi isch?“ hät d’Anila s’Schöfli Nr. 768 gfröget.
„Nei“, hät s’Schöfli gseit. „Ich han ebe Fondue überhaupt nöd gern. Süscht wär ich sicher au mit übere.“
„Und was mached mer jetzt?“ hät dä Mit gfröget.
„Jetzt gömmer die andere Schöfli go rette. Määäääh“ hät s’Schöfli Nr. 768 muetig gseit und zäme sind die drü loszoge.
Tapfer tüend’s d’Aktion Rettig starte.
Ihr aber müend bis morn jetzt warte!
Dä Mit und sini 2’000 Schöfli – Die Logorö-Adventsgeschichte 2017
Alle bisherigen Türchen unter:
