S’Schöfli Nr. 768
Die Suche von Mit und Anila nach einem eigenen Schaf nimmt eine unerwartete Wendung. Nicht sie müssen ein Schaf suchen, ein Schaf findet sie. Doch lest alles selber im Kapitel 3 der Logorö Adventsgeschichte 2017!
Previously on 2’000 Schöfli:
Will dä Mit keis Schöfli uf Wiehnachte übercho hät, hät er sini Sache packt und sich, zäme mit sinere Schwöschter Anila, uf d’Suechi nach emene eigene Schaf gmacht.
Kapitel 3
S’Schöfli Nr. 768
Wo dä Mit und d’Anila usem Feischter klätteret sind, sind sie z’erscht emal schülig verschrocke.
Es isch scho fürchterlich dunkel gsi veruss.
„Meinsch, das isch ä gueti Idee, jetzt im Dunkle los’z’zieh? Mir händ ja nöd emal ä Taschelampe mitgnah!“ hät d’Anila gseit.
Dä Mit hät zwar au echli Schiss gha im Dunkle, aber er isch no immer gnueg hässig gsi, dass er au das Jahr keis Schöfli uf Wiehnachte übercho hät und so hät er trotzig gseit: „Natürlich isch das ä gueti Idee! Los gaht’s!“
Ja, los gaht’s.
Bloss wo ane?
Zäme händ dä Mit und d’Anila überleit, wo sie ächt eher es Schöfli chönnted finde. Nach em Gartetörli links oder doch eher nach em Gartetörli rechts?
„Gradus chömmer zum Glück nöd gah, süscht würded mer grad det äne i d’Huuswand ine laufe“, hät dä Mit gmeint und is Dunkle use glacht. „Es bliibed eus also nur zwei Möglichkeite: links oder rechts.“
„Ach Mit“, hät d’Anila g’jammeret. „Mir händ ja überhaupt kein Plan. Wo um alles i dä Welt sölled mir bloss es Schöfli finde?“
„Määääääh“ hät’s plötzlich grad vor ihne gmacht.
„Määääääh!“
Vor em Mit und dä Anila – grad usse am Gartetörli – isch es chliises wiises Schöfli gstande. Im Liecht vo dä Strasselampe händ sie gseh, dass drü grossi Zahle mit emene Stift uf’s Fell vom Schöfli gmalt worde sind:
7, 6 und 8.
„Hoi zäme. Ich bin s’Schöfli Nr. 768 und wer sind ihr?“
„Ich bin dä Mit Nr. 1 und das isch mini Schwöschter d’Anila, ebefalls Nr. 1“
„Määäääääh!“ hät’s Schöfli gseit. „Määääääh. Ich bin froh, han ich eu so schnell gfunde. Ihr müend mir hälfe! Määääääh!“
Und dänn hät’s s’Schöfli Nr. 768 dene beide Chind verzellt, was passiert isch und wärum sie ihm unbedingt müend hälfe.
Du meine Güte! Jetzt gaht’s los!
Was isch dänn mit em Schöfli bloss?
Dä Mit und sini 2’000 Schöfli – Die Logorö-Adventsgeschichte 2017
Alle bisherigen Türchen unter:
