{"id":5068,"date":"2013-12-09T07:07:38","date_gmt":"2013-12-09T06:07:38","guid":{"rendered":"http:\/\/www.logoroe.ch\/?p=5068"},"modified":"2016-12-11T23:36:29","modified_gmt":"2016-12-11T22:36:29","slug":"dae-trotteligi-herr-igel","status":"publish","type":"post","link":"https:\/\/www.logoroe.ch\/?p=5068","title":{"rendered":"D\u00e4 trotteligi Herr Igel"},"content":{"rendered":"

\"\"<\/a><\/p>\n

Nach der \u00fcblen Attacke der Dichten-Tannen von gestern, droht bereits das fr\u00fche Ende der Geschichte! Doch wie immer, wenn man kein F\u00fcnkchen Hoffnung mehr hegt, naht von irgendwo her ein Retter. In der Not gibt man sich selbstverst\u00e4ndlich auch mit einem etwas trotteligen zufrieden…<\/p>\n

<\/p>\n

\n

Previously on Cliff und H\u00e4nger:<\/strong><\/span><\/p>\n

Uf ihrere Reis nach Loretanie grated d\u00e4 Cliff, d\u00e4 H\u00e4nger und d\u00e4 Gumpi anen Wald volle Dichte – B\u00e4um, wo mer nur in Reimform d\u00f6rf antworte! D\u00e4 Cliff meischteret all Tanne souver\u00e4n, bis uf die letschti! Det\u00e4 macht er en Fehler und l\u00f6st dad\u00e4mit en gwaltige Sturm us.<\/span><\/p><\/blockquote>\n

Kapitel 9
\nD\u00e4 trotteligi Herr Igel<\/h3>\n

Es isch en unglaubliche Tannezapfe-R\u00e4ge gsi, wo uf eusi Fr\u00fcnde abegheit isch. Hunderti, nei, Tuusigi, ja, Millione vo Tannez\u00e4pfe h\u00e4nd d\u00e4 Cliff, d\u00e4 H\u00e4nger und d\u00e4 Gumpi so richtig unter sich begrabe. Es h\u00e4t nume so prasslet und t\u00e4tscht und kl\u00f6pft vo all den\u00e4 Z\u00e4pfe, wo no meh uf d\u00e4 ganzi Huufe abegheit sind.<\/p>\n

Nach emene Wiili isch es d\u00e4nn still worde.<\/p>\n

Weder d\u00e4 Cliff, no d\u00e4 H\u00e4nger oder d\u00e4 Gumpi h\u00e4nd sich no ch\u00f6ne bewege. Sie sind gfange gsi unter emene riesige Berg vo Tannez\u00e4pfe. Es isch wortw\u00f6rtlich zapfeduschter gsi. Keine vo ihne h\u00e4t meh \u00f6ppis ch\u00f6ne gseh.<\/p>\n

„Hilfe! Hilfe!“ h\u00e4t d\u00e4 H\u00e4nger gruefe. Aber wer hett ihne d\u00e4nn scho ch\u00f6ne h\u00e4lfe i dem t\u00fc\u00fcfe Wald ine. Da isch doch sicher niemmert unterw\u00e4gs gsi, oder?<\/p>\n

Wiit ew\u00e4g h\u00e4nd sie liesligi Schritt gh\u00f6rt.<\/p>\n

Es sind immer \u00f6ppe dr\u00fc bis vier Schritt gsi, d\u00e4nn isch es Poltere cho, gfolgt vomene luute „Aua!“ und d\u00e4nn wieder neui Schritt.<\/p>\n

Sofort h\u00e4nd all dr\u00fc z\u00e4me nach Hilf gruefe und w\u00fcrkli! D’Schritt sind grad bi ihne zue verstummt und \u00f6pper h\u00e4t agfange, Tannez\u00e4pfe uf d’Siite z’ruume.<\/p>\n

Nach emene Wiili h\u00e4nd sie ihre Retter ch\u00f6ne erblicke. Es isch en alte Igel gsi, wo em Cliff, em H\u00e4nger und em Gumpi us d\u00e4 Tannez\u00e4pfe ghulfe h\u00e4t.<\/p>\n

„Ich bin d\u00e4 Herr Igel“ h\u00e4t er sich vorgschtellt. „Was mached d\u00e4nn ihr da unter dem Zapfeberg?“<\/p>\n

\"Herr<\/p>\n

Nachdem d\u00e4 Cliff alles verzellt h\u00e4t und em Herr Igel gseit h\u00e4t, dass sie w\u00e4nd go d’Prinz\u00e4ssin Lea rette, isch das stachlige Tier sofort F\u00fc\u00fcr und Flamme gsi.<\/p>\n

„Ou ja! Da mach ich mit! Ich hilf eu! Los gaht’s!“ Volle Tatedrang h\u00e4t d\u00e4 Herr Igel es paar Schritt gmacht und isch – P\u00e4ff! – uf emene Tannezapfe usgrutscht und ufs F\u00fcdli gheit. „Aua!“<\/p>\n

Die andere h\u00e4nd ihm welle ufh\u00e4lfe, doch d\u00e4 Herr Igel h\u00e4t nume abgwunke. „Keis Problem. Das passiert mir ununterbroche. Ich ha mich scho lang dra gw\u00f6hnt.“<\/p>\n

Er isch ufgstande, h\u00e4t es paar Tannez\u00e4pfe vo sine Stachle\u00a0abgsch\u00fcttlet und isch Bumm! \u00fcber d\u00e4 n\u00e4chschti Tannezapfe inegheit.<\/p>\n

D\u00e4 Cliff, d\u00e4 H\u00e4nger und au d\u00e4 Gumpi h\u00e4nd all grad gliichziitig s’Gliiche d\u00e4nkt.<\/p>\n

Wie s\u00f6ll eus au d\u00e4 trotteligi Herr Igel ch\u00f6nne h\u00e4lfe?<\/p>\n

Wo sie aber wiiter h\u00e4nd welle, h\u00e4nd sie gmerkt, dass sie total d’Orientierig verlore h\u00e4nd. Alli Dichtene vo vorher sind weg gsi und eusi Fr\u00fcnde h\u00e4nd n\u00fcme gw\u00fcsst, vo woher sie cho sind und i welli Richtig sie eigentlich h\u00e4nd wiiter welle.<\/p>\n

„Ihr w\u00e4nd nach Loretanie?“ h\u00e4t d\u00e4 Herr Igel gseit. „Ich zeig eu gern, wo’s dure gaht.“<\/p>\n

Er h\u00e4t ihne es Zeiche gmacht, dass sie ihm s\u00f6lled nahlaufe und isch schnuerstracks – Boing! – in n\u00e4chschte Baum ine gloffe. Uf das abe h\u00e4t sich d\u00e4 Herr Igel churz d’Nase griebe und gseit: „Ch\u00f6med er \u00e4ntli?“<\/p>\n

Mit emene Chopfsch\u00fcttle sind eusi Fr\u00fcnde em trottelige Herr Igel nagloffe. Und w\u00fcrklich! Nach \u00f6ppe 12 \u00dcber-Wurzle-Stolpere, 24 I-B\u00e4um-ine-Laufe und 18 Chopf-a-\u00c4scht-Aschlah sind sie scho usem Wald usecho.<\/p>\n

„Gsehnd er?“ h\u00e4t d\u00e4 Herr Igel stolz gmeint und h\u00e4t sich – Bumm! – s’Chn\u00fc amene Felse agschlage.<\/p>\n

Vor ihne isch jetzt n\u00e4mli alles total felsig gsi. Sie sind am Fuess vo d\u00e4 Giggeli-Berge gstande.<\/p>\n

Doch die Giggeli-Berge h\u00e4nd’s in sich gha. Scho nach wenige Meter, wo sie no ohni Problem h\u00e4nd ch\u00f6ne wiiter laufe, isch d’Felswand vor ihne fadegrad und supersteil duruf gange.<\/p>\n

„Da ch\u00f6med mir ja niemals ue!“ h\u00e4t d\u00e4 Cliff gjammeret und au die dr\u00fc andere h\u00e4nd nume truurig d’Ch\u00f6pf gsch\u00fcttlet und a die chalti Felswand aneglueget.<\/p>\n

Da h\u00e4nd sie ufs Mal hinter sich \u00f6ppis raschle gh\u00f6rt!<\/p>\n

Wie ch\u00f6med sie \u00e4cht\u00a0d\u00e4 Berg duruf?<\/span><\/strong>
\n Morn gaht’s wiiter mit neuem Schnuf.<\/span><\/strong><\/p>\n

\"\"<\/strong><\/p>\n

Cliff und H\u00e4nger – Die Logor\u00f6-Adventsgeschichte 2013<\/em><\/p>\n

Bisher erschienen:<\/em><\/p>\n