{"id":4207,"date":"2012-12-20T07:07:48","date_gmt":"2012-12-20T06:07:48","guid":{"rendered":"http:\/\/www.logoroe.ch\/?p=4207"},"modified":"2016-12-11T23:43:08","modified_gmt":"2016-12-11T22:43:08","slug":"gsellschaft-furs-fuule-eichhornli","status":"publish","type":"post","link":"https:\/\/www.logoroe.ch\/?p=4207","title":{"rendered":"Gsellschaft f\u00fcrs fuule Eichh\u00f6rnli"},"content":{"rendered":"

\"\"Langsam aber sicher geht der Advent seinem Ende entgegen und so m\u00fcssen auch die Logor\u00f6-Adventsgeschichten ihren Ausklang finden. Heute findet bereits der letzte Auftritt des faulen Eichh\u00f6rnchens statt. Doch dieses gibt nochmals Vollgas (ohne etwas dabei zu tun)…<\/p>\n

<\/p>\n

Gsellschaft f\u00fcrs fuule Eichh\u00f6rnli<\/strong><\/p>\n

Im Eichh\u00f6rnliwald isch d’Ziit cho, wo alli Eichh\u00f6rnli-M\u00e4nnli es Wiibli gsuecht h\u00e4nd und \u00e4 Familie gr\u00fcndet h\u00e4nd. Alli ussert euses fuule Eichh\u00f6rnli nat\u00fcrlich. Das hetti scho au gern \u00e4 h\u00fcbschi Eichh\u00f6rnli-Dame gh\u00fcrate aber ihm isch doch alles irgendwie echli z’astr\u00e4ngend gsi.<\/p>\n

Sini Fr\u00fcnde h\u00e4nd ihm well\u00e4 h\u00e4lfe. S’Reh Gollo h\u00e4t gmeint, s’fuule Eichh\u00f6rnli s\u00f6ll doch mal i d\u00e4 Ziitig luege, \u00f6b’s i d\u00e4 Rubrik „Eichh\u00f6rnli suecht Eichh\u00f6rnli“ es passends Inserat w\u00fcrd finde. Doch f\u00fcr das hetti s’fuule Eichh\u00f6rnli ja m\u00fcesse d’Ziitig ufschlah und l\u00e4se und das h\u00e4t’s n\u00f6d m\u00f6ge.<\/p>\n

D\u00e4 Dachs h\u00e4t vorgschlage, s’fuule Eichh\u00f6rnli ch\u00f6nnt doch in Turnverein gah. Det\u00e4 w\u00fcrd mer immer \u00f6pper finde zum H\u00fcrate. Doch s’fuule Eichh\u00f6rnli h\u00e4t d\u00e4 Dachs nume schr\u00e4g aglueget. „Turnverein? S\u00e4g emal, spinnsch du eigentlich?“<\/p>\n

So h\u00e4t’s fuule Eichh\u00f6rnli nadisna alli Vorschl\u00e4g vo sine Fr\u00fcnde verworfe und isch wiiterhin \u00e4llei i sim Baumloch ine uf em Sofa ghocket. Es isch grad so chli am id\u00f6se gsi, da h\u00e4t’s pl\u00f6tzlich tsch\u00e4dderet, t\u00e4tscht und kl\u00f6pft, dass s’fuule Eichh\u00f6rnli grad vom Sofa abegheit isch.<\/p>\n

Zmitzg i sinere Stube isch uf’s Mal es anders Eichh\u00f6rnli gl\u00e4ge. Ziemli vert\u00e4tscht und volle blaue Fl\u00e4cke. I d\u00e4 H\u00e4nd h\u00e4t’s no d\u00e4 Griff vomene Deltas\u00e4gler gha. D\u00e4 Rescht vo sim Fluggr\u00e4t isch zertr\u00fcmmeret une am Baum gl\u00e4ge. Das Eichh\u00f6rnli isch i vollem Flug in Baum vom fuule Eichh\u00f6rnli inet\u00e4tscht und grad durs Loch dure i d’Stube vom fuule Eichh\u00f6rnli inegspickt.<\/p>\n

S’inegst\u00fcrzte Eichh\u00f6rnli h\u00e4t sich greckt und gstreckt und glueget, \u00f6b’s irgendwo ernsthaft verletzt seg, d\u00e4nn h\u00e4t’s s’fuule Eichh\u00f6rnli entdeckt, wo v\u00f6llig schockiert vor sim Sofa uf em Bode ghockt isch. Fr\u00fcndlich h\u00e4t’s es begr\u00fcesst: „Gr\u00fcezi wohl, d\u00e4 Herr. Sie m\u00fcend entschuldige, dass ich bi Ihne so ineplatzt bin. D\u00f6rf ich mich vorstelle: Ich bin s’raschtlose Eichh\u00f6rnli.“<\/p>\n

Es h\u00e4t sich usegstellt, dass s’fuule Eichh\u00f6rnli s’raschtlose Eichh\u00f6rnli drum no nie im Wald gseh h\u00e4t, will s’raschtlose Eichh\u00f6rnli die ganzi Ziit \u00f6ppis am mache gsi isch. Am M\u00e4ntig isch es go Fallschirmspringe, am Tsischtig go Chl\u00e4ttere, am Mittwuch go Kajak-Fahre, am Dunnschtig go Bungee-Jumpe, am Friitig go T\u00fcfseetauche und am Samschtig go Motocross-Fahre. Am Sunntig h\u00e4t’s sich usgrueht und isch nume go Schispringe gange.<\/p>\n

D\u00e4 Zuefall h\u00e4t’s welle, dass s’raschtlose Eichh\u00f6rnli au nonig verh\u00fcratet gsi isch. Alli bisherige Fr\u00fcnde vo ihm hebed sich immer beklagt, dass es nie Ziit f\u00fcr sie gha hebi.<\/p>\n

S’fuule Eichh\u00f6rnli h\u00e4t d’Gleg\u00e4heit bim Schopf packt und s’raschtlose Eichh\u00f6rnli grad vom Fl\u00e4ck weg gh\u00fcrate. Es h\u00e4t ihm versproche, dass es ihm nie wird im W\u00e4g stah bi all sine Aktivit\u00e4te, solang es s\u00e4lber d\u00f6rfti ungst\u00f6rt dihei uf em Sofa liege bliebe. Und das h\u00e4t pr\u00e4chtig klappet. Am Abig h\u00e4t s’raschtlose Eichh\u00f6rnli amigs verzellt, was es alles d\u00e4 Tag dure erl\u00e4bt h\u00e4t und s’fuule Eichh\u00f6rnli isch meistens d\u00e4bi igschlafe.<\/p>\n

Sie sind es L\u00e4be lang gl\u00fccklich gsi mitenand und h\u00e4nd siebe Chind gha. S’erschte h\u00e4t Bequem gheisse, s’zweite Tr\u00e4g, s’dritte Phlegma, s’vierte Fuulenzi, s’foifte Gm\u00fcetli, s’s\u00e4chste Simpel und s’siebte Fuulpelz.<\/p>\n

\"\"<\/p>\n

Der Logor\u00f6-D\u00f6delgeschichten-Adventskalender 2012<\/em><\/em><\/em><\/p>\n

Bisher erschienen:<\/em><\/em><\/em><\/em><\/p>\n