{"id":4204,"date":"2012-12-19T07:07:00","date_gmt":"2012-12-19T06:07:00","guid":{"rendered":"http:\/\/www.logoroe.ch\/?p=4204"},"modified":"2016-12-11T23:43:16","modified_gmt":"2016-12-11T22:43:16","slug":"dgschicht-vom-ma-wo-uf-alles-reime-cha","status":"publish","type":"post","link":"https:\/\/www.logoroe.ch\/?p=4204","title":{"rendered":"D’Gschicht vom Ma, wo uf alles reime cha"},"content":{"rendered":"

\"\"Heute Leute, gibt’s Poesie wie nie! Ein Mann, ein Reim! Ohne geht er niemals heim. Wer sie verpasst, die Story, ist selber sorry. Sie ist voll krass, ich w\u00fcnsch viel Spass!<\/p>\n

<\/p>\n

D’Gschicht vom Ma, wo uf alles reime cha<\/strong><\/p>\n

Es isch emal d\u00e4 Herr Ohal\u00e4tzichreimallieuris\u00e4tz gsi, d\u00e4 h\u00e4t zwar keis grosses Problem gha, aber d\u00e4f\u00fcr en r\u00e4chte Eggenab. Er h\u00e4t n\u00e4mlich immer all S\u00e4tz, wo anderi L\u00fc\u00fct zu ihm gseit h\u00e4nd, mit emene Reim m\u00fcesse beantworte.<\/p>\n

Das h\u00e4t d\u00e4nn in \u00f6ppe so usgseh:<\/p>\n

Wenn d\u00e4 P\u00f6schtler ihm zuegruefe h\u00e4t: „Ich han Poscht f\u00fcr Sie“, h\u00e4t er g’antwortet: „Ich hoffe es isch kein Izahligsschii.“<\/p>\n

Wenn d’Frau a d\u00e4 Migros-Kasse gfr\u00f6get h\u00e4t: „H\u00e4nd Sie \u00e4 Cumulus-Charte?“ h\u00e4t er gseit: „Ja scho, aber die hani vergrabe im Garte.“<\/p>\n

Wenn sin Chef ihm gruefe h\u00e4t: „Herr Ohal\u00e4tzichreimallieuris\u00e4tz, ch\u00f6nd Sie bitte mal cho?“ h\u00e4t er zrugg gruefe: „Nat\u00fcrlich Herr Chef, ich versohl Ihne d\u00e4 Po.“<\/p>\n

Ja, er isch en glatte Cheib gsi, d\u00e4 Herr Ohal\u00e4tzichreimallieuris\u00e4tz.<\/p>\n

Wo er d\u00e4nn gfunde h\u00e4t, es seg jetzt langsam a d\u00e4 Ziit zum H\u00fcrate, h\u00e4t er es Inserat i d’Ziitig gsetzt:<\/p>\n

„Liebe sch\u00f6ne Frauen, ich tu euch niemals hauen. Ich bin ein lustiges Kerlchen und suche hier ein Perlchen. Bitte schreibet mir, dann trinken wir hier bald ein Bier am Klavier. Fertig mit dem Gschw\u00e4tz, Herr Ohal\u00e4tzichreimallieuris\u00e4tz.“\n<\/p><\/blockquote>\n

Schn\u00e4ll drufabe isch die erschti Frau ihn go bsueche cho. Sie h\u00e4t Frau Ichs\u00e4genien\u00fct gheisse und h\u00e4t nie n\u00fct gseit. D\u00e4 Herr Ohal\u00e4tzichreimallieuris\u00e4tz h\u00e4t sie unbedingt mit emene Reim welle begr\u00fcesse und drum h\u00e4t er vo sich us n\u00fct gseit und gspannt uf ihri Begr\u00fcessig gwartet. Was will mer s\u00e4ge? Sie h\u00e4nd sich foif Minute lang agschwiege und d\u00e4nn isch d’Frau Ichs\u00e4genien\u00fct wortlos wieder gange.<\/p>\n

Mit d\u00e4 zweite Frau isch es n\u00f6d besser worde. Es isch d’Frau Ichred\u00e4furchtbarkompliziert gsi und die h\u00e4t furchtbar kompliziert gredt. Sie h\u00e4t gseit: „Gegr\u00fcsst sei er exorbitant“ und er h\u00e4t gstammlet: „\u00c4h, \u00f6h, ich gr\u00fcesse auch d\u00e4 Elifant.“ Sie h\u00e4t gseit: „Ihre Blumen duften kokett“ und er h\u00e4t abgwunke: „G\u00f6nd Sie wieder! Sie sind gar n\u00f6d nett.“<\/p>\n

Die dritt Frau aber h\u00e4t voll igschlage! Es isch d’Frau Alleswasichs\u00e4geh\u00f6rtufmitach gsi und alles was sie gseit h\u00e4t, h\u00e4t ufgh\u00f6rt mit „ach“. Sie h\u00e4t gseit: „Ich ha n\u00f6d gern Krach“ und er h\u00e4t g’antwortet: „Super! Ich spiel‘ einzig Schach.“ Sie h\u00e4t gseit: „Ich f\u00fchl mich es bizzeli schwach“ und er h\u00e4t gseit: „D\u00e4nn lieged sie doch da uf d\u00e4 Bode flach.“<\/p>\n

Und will’s f\u00fcr d\u00e4 Herr Ohal\u00e4tzichreimallieuris\u00e4tz nat\u00fcrlich viel eifacher gsi isch zum reime, wenn er scho gw\u00fcsst h\u00e4t, mit wellere Silbe d’S\u00e4tz vo d\u00e4 Frau Alleswasichs\u00e4geh\u00f6rtufmitach ufh\u00f6ret (und will sie ihm au s\u00fcscht ganz guet gfalle h\u00e4t), h\u00e4t er d’Frau Alleswasichs\u00e4geh\u00f6rtufmitach grad vom Fl\u00e4ck weg gh\u00fcrate. Sie sind \u00e4s L\u00e4be lang gl\u00fccklich gsi mitenand und h\u00e4nd siebe Chind gha. S’erschte h\u00e4t Wallach gheisse, s’zweite Gheimfach, s’dritte Dorfbach, s’vierte Zeltdach, s’foifte Schuelfach, s’s\u00e4chste Privatgmach und s’siebte Tierschabloneufbewahrigsfach.<\/p>\n

Gwohnt h\u00e4nd sie \u00fcbrigens in B\u00fclach.<\/p>\n

\"\"<\/p>\n

Der Logor\u00f6-D\u00f6delgeschichten-Adventskalender 2012<\/em><\/em><\/em><\/p>\n

Bisher erschienen:<\/em><\/em><\/em><\/em><\/p>\n