{"id":4160,"date":"2012-12-10T07:07:40","date_gmt":"2012-12-10T06:07:40","guid":{"rendered":"http:\/\/www.logoroe.ch\/?p=4160"},"modified":"2016-12-11T23:45:05","modified_gmt":"2016-12-11T22:45:05","slug":"chaos-im-eichhornliwald","status":"publish","type":"post","link":"https:\/\/www.logoroe.ch\/?p=4160","title":{"rendered":"Chaos im Eichh\u00f6rnliwald"},"content":{"rendered":"

\"\"In der heutigen Logor\u00f6-Adventsgeschichte begeben wir uns wieder in den Wald der Tausend Eichh\u00f6rnchen und schauen, was das faulste Exemplar dieser Gattung so alles anstellt… <\/p>\n

<\/p>\n

Chaos im Eichh\u00f6rnliwald<\/strong><\/p>\n

Nachdem im Tuusig-Eichh\u00f6rnli-Wald all Eichh\u00f6rnli ihri Wohnige mit Nummereschilder agschriebe h\u00e4nd und nume s’fuule Eichh\u00f6rnli als einzigs imene Baumloch ohni Nummere gwohnt h\u00e4t, isch bekanntlich Rueh ikehrt im Tuusig-Eichh\u00f6rnli-Wald.<\/p>\n

Doch irgendwie h\u00e4t’s all Eichh\u00f6rnli gnervt, dass jed\u00e4s vo ihne h\u00e4t m\u00fcesse es T\u00fcrschild anenagle und nume s’fuule Eichh\u00f6rnli eifach gar n\u00fct h\u00e4t m\u00fcesse leischte. So h\u00e4nd sie sich heimlich troffe und ganz en gemeine Plan usgheckt!<\/p>\n

Amene Morge isch s’fuule Eichh\u00f6rnli vo sim Baum abekl\u00e4tteret und echli go spaziere gange. S’Nachbars-Eichh\u00f6rnli, wo das dur es chliises Loch i sim Baum beobachtet h\u00e4t, h\u00e4t dr\u00fc Mal luut uf sini N\u00fcsslitrummele gschlage. Das isch s’Signal f\u00fcr alli andere Eichh\u00f6rnli gsi.<\/p>\n

All z\u00e4me h\u00e4nd ihri Nummereschilder vo d\u00e4 B\u00e4um weggnah und sind sich husch husch hinter em gr\u00f6schte Baum im Wald go verstecke. 999 Eichh\u00f6rnli hinter eim einzige Baum! Das h\u00e4t d\u00e4nn es Gedr\u00e4nge g\u00e4h, huiuiui, au wenn’s w\u00fcrklich ganz en grosse Baum gsi isch.<\/p>\n

Uf all F\u00e4ll isch s’fuule Eichh\u00f6rnli irgendw\u00e4nn vom Spaziere zrugg cho und h\u00e4t i sini Wohnig welle. Es h\u00e4t ufeglueget und s’Baumloch ohni Nummereschild gsuecht. Will aber kein einzige Baum meh \u00e4s Schild dra gha h\u00e4t, isch es v\u00f6llig verdutzt stah bliebe und n\u00fcme drus cho.<\/p>\n

„Ha ha!“ h\u00e4nd ufs Mal die andere Eichh\u00f6rnli gruefe und sind hinter em grosse Baum f\u00fcre cho. Sie h\u00e4nd giggel\u00e4t und gaggs\u00e4t, so fescht h\u00e4nd sie sich gfroit, dass ihre Plan funktioniert h\u00e4t. Sie h\u00e4nd em fuule Eichh\u00f6rnli erchl\u00e4rt, dass sie ihm heb\u00e4d welle \u00e4 Lektion erteile und sie drum extra alli ihri Schilder weggnah heb\u00e4d.<\/p>\n

S’fuule Eichh\u00f6rnli h\u00e4t churz \u00fcberleit und d\u00e4nn langsam dr\u00fc Mal i d’H\u00e4nd klatscht. „Super. Ihr h\u00e4nd mich drigleit. Gratuliere. Das wird mir \u00e4 Lehr si. ICH aber fr\u00f6ge mich, wie d\u00e4nn IHR jetzt wieder i EUI Wohnige finde w\u00e4nd.“<\/p>\n

Die andere Eichh\u00f6rnli h\u00e4nd sich aglueget. Jedes h\u00e4t sis Nummereschild i d\u00e4 H\u00e4nd gha. Sie h\u00e4nd im Wald umeglueget. 1000 B\u00e4um mit 1000 L\u00f6cher, wo all jetzt wieder tupfgenau glich usgseh h\u00e4nd. Es isch sehr still worde im Wald.<\/p>\n

D\u00e4nn isch es chliises Eichh\u00f6rnli uf en Baum kl\u00e4tteret, churz im Loch verschwunde und wieder usecho. 999 Eichh\u00f6rnli h\u00e4nd gspannt ufeglueget. „Da wohn ich n\u00f6d!“ h\u00e4t’s chliine Eichh\u00f6rnli verzwiiflet abegruefe.<\/p>\n

Sofort sind all Eichh\u00f6rnli losgflitzt! Hei, h\u00e4t das \u00e4s Durenand g\u00e4h! \u00dcberall sind Eichh\u00f6rnli i Wohnige ine, wieder use cho und h\u00e4nd „Da wohn ich n\u00f6d!“ gruefe. Im ganze Wald h\u00e4t’s stundelang vo \u00fcberall her t\u00f6nt: „Da wohn ich n\u00f6d! Da wohn ich n\u00f6d! Da wohn ich n\u00f6d!“<\/p>\n

S’fuule Eichh\u00f6rnli h\u00e4t sich’s am Bode bequem gmacht und gwartet, bis nach langer Ziit \u00e4ndlich all Eichh\u00f6rnli ihri eigeni Wohnig wieder gfunde h\u00e4nd. Sofort h\u00e4nd all ihri Nummereschilder ganz fescht und f\u00fcr immer agnaglet.<\/p>\n

D\u00e4nn h\u00e4t s’fuule Eichh\u00f6rnli gm\u00fcetlich d\u00e4 einzig Baum gsuecht, wo no immer kei Nummere dra gha h\u00e4t, isch i sini Wohnig kl\u00e4tteret und h\u00e4t d\u00e4 Fernseh igschtellt. „3 N\u00fcsse f\u00fcr Aschenbr\u00f6del“ isch grad gloffe. S’fuule Eichh\u00f6rnli isch ufs Sofa gl\u00e4ge und gl\u00fccklich igschlafe.<\/p>\n

\"\"<\/p>\n

Der Logor\u00f6-D\u00f6delgeschichten-Adventskalender 2012<\/em><\/em><\/em><\/p>\n

Bisher erschienen:<\/em><\/em><\/em><\/em><\/p>\n