{"id":4100,"date":"2012-12-05T07:07:32","date_gmt":"2012-12-05T06:07:32","guid":{"rendered":"http:\/\/www.logoroe.ch\/?p=4100"},"modified":"2016-12-11T23:45:38","modified_gmt":"2016-12-11T22:45:38","slug":"gegesiitigi-hilf-hilft-gegesiitig","status":"publish","type":"post","link":"https:\/\/www.logoroe.ch\/?p=4100","title":{"rendered":"Gegesiitigi Hilf hilft gegesiitig"},"content":{"rendered":"

\"\"Mit der heutigen Advents-D\u00f6delgeschichte wird der erzwungene Blocksatz dieser Blog-Seite leider massiv unter Druck gesetzt, was furchtbar grosse Textl\u00fccken zur Folge hat. Wer will, darf den Text ausdrucken und die L\u00fccken ausmalen. So oder so viel Vergn\u00fcgen mit den wohl l\u00e4ngsten Nachnamen dieser Welt.<\/p>\n

<\/p>\n

Gegesiitigi Hilf hilft gegesiitig<\/strong><\/p>\n

Es isch emal d\u00e4 Herr Ichluegimmernumenufd\u00e4bodeundnienedanderschthi gsi, d\u00e4 h\u00e4t es grosses Problem gha. Er h\u00e4t n\u00e4mlich immer nume uf d\u00e4 Bode glueget und niened anderscht hi. D\u00e4 Vorteil vo dem isch gsi, dass er i sim ganze L\u00e4be no nie irgendwo ines Loch inegheit isch. Au h\u00e4t er scho ganz viel Geldst\u00fcckli gfunde, wo anderi verlore h\u00e4nd.<\/p>\n

Aber es isch nat\u00fcrlich au echli schad gsi. Eimal isch d\u00e4 Herr Ichluegimmernumenufd\u00e4bodeundnienedanderschthi zum Bischpil uf Prag i d’Ferie gange. Wo er zrugg cho isch, h\u00e4nd d’L\u00fc\u00fct ihn gfr\u00f6get, \u00f6b er d\u00e4nn all die sch\u00f6ne H\u00fc\u00fcser gseh heb, f\u00fcr die Prag bekannt seg. „Nei“, h\u00e4t er gseit, „aber d\u00e4 Bode isch ganz sch\u00f6n dreckig det\u00e4.“<\/p>\n

Es anders Mal isch d\u00e4 Herr Ichluegimmernumenufd\u00e4bodeundnienedanderschthi anen Tschuttimatsch gange. „Wie isch er usgange?“ h\u00e4nd d’L\u00fc\u00fct welle w\u00fcsse. „25 Kaugummi zu 12 Wurschtpapierli“ h\u00e4nd sie als Antwort \u00fcbercho.<\/p>\n

Mit d\u00e4 Fraue h\u00e4t\u2019s d\u00e4 Herr Ichluegimmernumenufd\u00e4bodeundnienedanderschthi leider n\u00f6d eso guet gha. Ei Fr\u00fcndin h\u00e4t ihn mal gfr\u00f6get, \u00f6b er eigentlich w\u00fcssi, was sie f\u00fcr \u00e4 Augefarb hebi. „Wenn sie glich isch wie d’Farb vo dine Schueh, d\u00e4nn bruun“ h\u00e4t er gseit und – was s\u00f6ll mer s\u00e4ge? – sie isch d\u00e4nn sp\u00f6ter n\u00fcme sini Fr\u00fcndin gsi.<\/p>\n

Eimal h\u00e4t er bim Minigolfspiele (das h\u00e4t d\u00e4 Herr Ichluegimmernumenufd\u00e4bodeundnienedanderschthi r\u00e4cht guet ch\u00f6ne) Mitleid \u00fcbercho mit enere herzige Frau, wo sicher scho 714 Mal versuecht h\u00e4t, d\u00e4 Minigolfball bi d\u00e4 erschte Bahn is Loch z’t\u00fcpfe. Sie h\u00e4t aber meischtens mit em Schl\u00e4ger n\u00f6d emal d\u00e4 Ball t\u00fcpft, geschwiige d\u00e4nn s’Loch.<\/p>\n

Er isch zu ihre ane und h\u00e4t gfr\u00f6get \u00f6b mer ihre h\u00e4lfe ch\u00f6nni. Er segi \u00fcbrigens d\u00e4 Herr Ichluegimmernumenufd\u00e4bodeundnienedanderschthi. „Ou das trifft sich sehr guet“ h\u00e4t d’Frau freudig usgruefe. „Ich bin d’Frau Ichluegimmernumeninhimmelundstahninjedegaggiine und luege immer in Himmel und stahn i jede Gaggi ine.“<\/p>\n

Sie h\u00e4nd sich uf Ahieb guet verstande. D’Frau Ichluegimmernumeninhimmelundstahninjedegaggiine h\u00e4t em Herr Ichluegimmernumenufd\u00e4bodeundnienedanderschthi verzellt, wie sch\u00f6n alles am Himmel usgseht. Sie h\u00e4t ihm erchl\u00e4rt, dass d’Wulchene m\u00e4ngisch wie Tier usgseh w\u00fcrdet. Sie h\u00e4t ihm gschilderet, wie sch\u00f6n d’Sterne i d\u00e4 Nacht l\u00fcchte ch\u00f6nd. Sie h\u00e4t ihm enth\u00fcllt, dass d’V\u00f6gel n\u00f6d nume uf em Bode hocket und i d\u00e4 Erde picket (\u00f6ppis, wo sie s\u00e4lber gar n\u00f6d gw\u00fcsst h\u00e4t), sondern dass sie am Himmel schw\u00e4be und Chreise fl\u00fcge w\u00fcrded.<\/p>\n

Im Gegezug h\u00e4t d\u00e4 Herr Ichluegimmernumenufd\u00e4bodeundnienedanderschthi d\u00e4f\u00fcr gsorget, dass d’Frau Ichluegimmernumeninhimmelundstahninjedegaggiine i ihrem ganze L\u00e4be nie meh inen Gaggi inegstande isch.<\/p>\n

Sie h\u00e4nd gh\u00fcrate und sind s’L\u00e4be lang gl\u00fccklich gsi mitenand. Sie h\u00e4nd siebe Chind gha. S’erschte h\u00e4t Parkett gheisse, s’zweite Bodelumpe, s’dritte Trottoir, s’vierte Gullideckel, s’foifte Schneematsch, s’s\u00e4chste Strassechride und s’siebte Horizont.<\/p>\n

\"\"<\/p>\n

Der Logor\u00f6-D\u00f6delgeschichten-Adventskalender 2012<\/em><\/em><\/p>\n

Bisher erschienen:<\/em><\/em><\/p>\n